اسلام آباد۔7دسمبر (اے پی پی): مزن وزیر عمران خان ءَ پنت ءُ شون کت کہ ھاٹیگ ءِ شوبگ ءِ تہءَ گیش گہتری آرگ ءِ واستہ توامیں گامگیج چست کنگ بہ بنت، انچیں نظام ءِ سہرا کنگ بہ بیت کہ آئی ءَ سبسڈی ایوک ءَ گریب ءُ بزگریں مردم آناں پجاری کنگ بہ بنت۔ اے پنت ءُ شونگ آئی ءَ دفو شمبے ءَ ھاٹیگ ءِ شوبگ ءَ گہتری ءِ ھوالگ ءَ چار ءُ تپاسی دیوان ءِ سروکی ءَ کنان ءَ کت۔ دیوان ءَ بنجاھی وزیر صنعت ءُ پیداوار حماد اظہر، بنجاھی وزیر اھوالکاری ءُ شنگ کاری سینیٹر شبلی فراز، بنجاھی وزیر منصوبگ بندی، دیمروئی ءُ گہتری کار اسد عمر، بنجاھی وزیر توان ءُ پٹرولیم عمر ایوب خان، مشیر تجارت عبدالرزاق دائود، مشیر ھزانگ حفیظ شیخ، مزن وزیر ءِ ھاسیں کمکار برائے پٹرولیم ندیم بابر، ھاسیں کمکار برائے توان تابش گوہر ءَ ابید مزن تکی اپسرگ آں بھر زوری کت۔ دیوان ءَ ھاٹیگ ءِ شوبگ ءَ گوں بندوکیں انتظامی کار، توان ءِ پیداوار نیاد ءُ شنگ ءُ تالانی نظام ءِ سر ءَ سرجمیں رنگ ءَ بریفنگ دیگ بوت۔ مزن وزیر ءَ ھاٹیگ ءِ شوبگ ءِ تہ ءَ گیش گہتری آرگ ءِ واستہ توامیں گامگیج چست کنگ ءِ پنت ءُ شون کت۔ مزن وزیر ءَ پنت ءُ شون کہ ھاٹیگ ءِ شوبگ ءَ گوں بندوکیں توامیں سیادی داروکیں پریک آں وتی وتی زمہ واری آناں گیشینتگیں وھد ءُ پاس آنی تہءَ سرجم بکن ات۔ مزن وزیر ءَ گیش پنت ءُ شون کت کہ انچیں نظام ءِ سہرا کنگ بہ بیت کہ آئی بدولت ءَ سبسڈی ایوک ءَ گریب ءُ بزگریں مردم آناں بہ رس انت۔
