اسلام آباد۔ 07 دسمبر (اے پی پی) بنجائی وزیر اقتصادی امور مخدوم خسرو بختیار پارینے کہ پاکستان ڈیہہ نا شونداری کن نیامی ایشیائی ریاست آتا اقتصادی تنظیم(کاریک) تون کمکاری ءِ برجاتخک، تنظیم آجو واپار نا علاقائی معاہدہ غا سجفے۔ اوداہیت ءِ دوشنبے نادے آ داڑے کاریک نا 19 می وزارتی دیوان اٹی ورچوئل شرکت نا وخت آ گپ وتران کرسا پارے۔ کانفرنس اٹی 11 ملک آتا وزیر آک و 6 شونداری شریدار آک بشخ ہلکر۔ اوغانستان نا صدر ڈاکٹر اشرف غنی دیوان اٹی خصوصی بشخ ہلک۔ اوتینا گونڈ انگا کلہو اٹی وزیراعظم عمران خان نا ساڑی آ دورہ اوغانستان نا خاص وڑاٹ ستاءِ کرے و پارے کہ وزیراعظم نا دورہ ہڑتوم آ ملک آتا نیام اٹ تعلقداری تا مون آ دننگ و علاقائی کمکاری و سوگوی کن مزل نا حیثیت تخک۔ دیوان آن اوغانستان، آذربائیجان، چین، جارجیا، قزاخستان، کرغزستان، پاکستان، منگولیا، تاجکستان و ترکمانستان نا وزیر آک و سینئر نمائندہ آک تران کریر۔ داکان بیدس ایشیائی شونداری بینک، جہانی مالیاتی فنڈ، جہانی بینک، یو ایس ایڈ، اقوام متحدہ نا ایجنسی، جہانی واپاری تنظیم، جاپان نا ایجنسی جہانی کمکار جائیکا تون اوار کیہی شونداری شریدار آتا نمائندہ غاک ہم دیوان اٹی بشخ ہلکر۔ بنجائی وزیر مخدوم خسرو بختیار دیوان آن تران کرسا پارے کہ کاریک کون آ علاقائی تنظیم تا اہمیت ءِ مون آ تخا۔ اوپارے کہ داوڑنا تنظیمک پائیدار شونداری و اقتصادی ودیکی نا اسیجائی ہدف آتا دوئی کننگ اٹ کمکار مریرہ۔ اوپارے کہ علاقائی ملک آتانیام اٹ نئے بیرہ روڈ آتا نیٹ ورک بلکن ریل، ہوابازی و بندرگاہ تا کمک اٹ ہم رابطہ غاتے ودفنگے، داڑآن ڈیہہ ٹی واپار و سیل و سوات نا کاریم نا کچ آن فائدہ ہرفنگ مریک۔ اوکاریک نا فریم ورک انا تائید ءِ کرے و پارے کہ گرج داہیت انا ءِ کہ خاص قابل حصول و تعلقدار ہدف آتا تعین ءِ کننگے، داوڑنا ہدف آتا سالانہ بنداو آ چاروکی ہم ممکن مریک و داڑآ پیش رفت نا بارواٹی وخت آ گاہی دوئی مریک۔ مخدوم خسرو بختیار پارے کہ سیل و سوات ساڑی حکومت نا قومی شونداری پالیسی نا اہم جزو ءِ۔ اوسیل و سوات نا علاقائی راہداری، کاریک بزنس کونسل نا جوڑ کننگ وعلاقائی ملک آتا نجی بشخ آتا نیام اٹ سیل و سوات نا بشخ اٹی کمکاری ءِ مون آ دننگ نا گرج آ زور شاغا۔ اوپارے کہ پاکستان نا ساڑی حکومت زرکاری ٹی ودکی کن نجی بشخ ءِ آسراتی تننگ آ خاص چکار کننگ ءِ۔ اوگڑاس بشخ آتیٹی ‘‘کاریک سٹیکر’’ نا حالیت اٹ ویزا آسراتی نظام نا سلاہ ءِ ہم پیش کرے و پارے کہ داٹی علاقائی کہول آ رابطہ غاتے مون آ دننگ اٹ کمک رسینگک۔
