صدر مملکت ڈاکٹر عارف علوی تون پاکستان اٹی بیلا روس انا دزکش مروک آ سفیر نا سپاروکی اوڑدہی

اسلام آباد۔ 07 دسمبر (اے پی پی) صدر مملکت ڈاکٹر عارف علوی پارینے کہ پاکستان بیلاروس تون تعلقداری تے بھاز قدر انا نظراٹ ہرک، پاکستان واپار و زرکاری، سائنس و ٹیکنالوجی، دودوربیدہ و دفاع تون اوار تین پہ تینی است خواہی نا غٹ بشخ آتیٹی ہڑتوم آ کنڈآتا تعلقداری تے پین مون آ دننگ خواہک۔ داخیال آتا درشانی ءِ او دوشنبے نادے آ پاکستان اٹی بیلاروس نا دزکش مروک آ سفیر اینڈدی ارمولووچ تون سپاروکی اوڑدہی ٹی گپ و تران کرسا کرے ۔ صدر مملکت ڈاکٹر عارف علوی پارے کہ پاکستان بیلاروس تون واپاری و دودوربیدہ ئی کمکاری ءِ مون آ دننگ نا خواہندار ءِ۔ اوپارے کہ پاکستان اسیجائی ڈٹ و زرکاری کن است بڈ وارخواہی پیش کیک۔ صدر عارف علوی پارے کہ ہڑتوم آ ملک آتا نیام اٹ دودوربیدہ، سیل و سوات و دواسازی نا بشخ آتیٹی کمکاری نا بھلو گنجائشست اس ساڑی ءِ۔ اوپارے کہ ہڑتوم آ ملک آتا نیام اٹ تعلیم نا پڑ اٹ کمکاری نا بابت مفاہمت نا یات داشت آتیان دودوربیدہ ئی رابطہ غاتے مون آ دننگک۔ صدر عارف علوی اومیت ظاہر کرے کہ دزکش مروک آ سفیر پاکستان و بیلاروس نا نیام اٹ تعلقداری تے مون آ دننگ اٹ تینا کڑد ءِ ادا کرساکیک۔