اسلام آباد۔ 07 دسمبر (اے پی پی) بنجائی وزیر توانائی عمر ایوب خان تون پاکستان اٹی چین نا سفیر نونگ رونگ دوشنبےنادے آ داڑے اوڑدہی کرے و چین پاکستان اقتصادی راہداری نا رداٹ بجلی نا ڈٹ آتیا پیش رفت آ گپ وتران کرے و ہڑتوم آ ملک آتا نیام اٹ توانائی نا بشخ اٹی کمکاری آ امنا کریر۔ دوشنبے نادے آ وزارت توانائی آن جاری بیان نا رداٹ اوڑدہی ٹی چین پاکستان اقتصادی راہداری اتھارٹی نا چیئرمین لیفٹیننٹ جنرل (ر) عاصم سلیم باجوہ، وزیراعظم نا خصوصی کمکار بجلی تابش گوہر و سیکرٹری بجلی علی رضا بھٹہ ئسک ہم ساڑی ئسر۔ بنجائی وزیر توانائی چین نا سفیر ءِ خصوصی اقتصادی زون تے بجلی نا فراوانی، بجلی نا بشخ اٹی فراوانی و بشخنگ نا نسخان تا توننگ کن حکومتی گام گیج آتیان معلومدار کرے و پارے کہ اقتصادی زون تیان روزگار نا ہزار آ پوسکن ءُ وارخواہی ودی مریک۔ عمرایوب خان پارے کہ ساڑی حکومت قابل تجدید توانائی ٹی ودکی نا کمک اٹ بجلی نا پیدواری خڑچ اٹی کمتی اتنگ کن گام گیج کننگ ءِ۔ توانائی نا نہاد نا سوگو و اڑزآن نظام ملک اٹ اقتصادی سرجزآتیٹی ودکی نا سوب مریک۔ داوخت آ چین نا سفیر توانائی نا بشخ اٹی اصلاحات کن حکومت نا عزم انا ستاءِ کرے و پارے کہ چین سی پیک نا رداٹ بجلی نا ڈٹ آتون اوار توانائی نا بشخ اٹی پاکستان تون اواری اٹ کاریم ءِ برجاتخنگ اٹ بھاز است خواہی تخک۔ اوبجلی نا ڈٹ آتیا پیش رفت ءِ ترند کننگ کن پاکستان نا حکومت و وزارت توانائی نا کوشست آتا ستاءِ کرے۔
