اسلام آباد۔ 07دسمبر (اے پی پی) اسپیکر قومی اسمبلی اسد قیصر پارینے کہ ووٹر ڈے ءِ اڈتننگ نا مسخت وونٹ انا اہمیت و فائدہ غاتے تالان کننگ ءِ، وونٹ انا کمک اٹ الس ءِ تینا مرضی نا سرکڑدہ غاتا گچین کننگ نا موقع ملک، جمہوری نظام اٹ ہر شاری ءِ تینا حق رائے دہی ءِ کاریم اٹ اتنگ نا حق دوئی ءِ۔ قومی اسمبلی سیکرٹریٹ نا رداٹ داخیال آتا درشانی ءِ اسپیکر و ڈپٹی اسپیکر ووٹر ڈے انا وخت آ تینا کلہو اٹی کریر۔ اسپیکر قومی اسمبلی پارے کہ اسلامی جمہوریہ پاکستان نا آئین ملک اٹ رہینگوک آ غٹ مخلوق ءِ حق رائے دہی نا کمک اٹ جمہوری واک آتے سوگو کننگ نا پورو اختیار ایتک۔ اسد قیصر پارے کہ گچین کاری عمل اٹ زالبول آتا کڑد بھاز اہم ءِ ہرافتا کمک اٹ او تینا حق انا رکھ ءِ کننگ کیرہ۔ پاکستان نا جم وڑاٹ 97 ملین رجسٹرڈ ووٹرز وونٹ انا کمک اٹ تینا حق رائے دہی ءِ کاریم اٹ اتنگ کیرہ۔ملک اٹی 44 درسد وونٹر آتا وئی 35 سال اسکان ءِ ہرا گچین کاری عمل آ مثبت اثرمرتب کننگ کیرہ۔ اپوزیشن و حکومت ءِ اسہ ایلو نا اختلاف آتے گیرام کرسا اسیجائی وڑاٹ گچین کاری اصلاحات اتنگ نا گرج ءِ۔ اوپارے کہ جمہوریت ہربندغ ءِ ملکی باندات آتیٹی تینا بشخ ءِ شاغنگ نا موقع فراوان کیک۔ جمہوری سوگوی ودی کرسا نن تینا وطن ءِ اسہ شون ہلوک ملک اس جوڑ کننگ کینہ۔ جمہوریت اٹ الس ءِ تینا مرضی نا سرکڑدہ غاتے گچین کننگ نا اختیار دوئی ءِ۔ اوپارے کہ جمہوریت نا تسلسل ءِ برقرار تخنگ کن وونٹر آتا فیصلہ ءِ اہمیت تروئی مریک۔ جمہوریت نا مننگ تون ہر بندغ ءِ تینا حق رائے دہی ءِ اختیار کننگ نا پورو اختیار دوئی ءِ۔ دا بابت تینا کلہو اٹی ڈپٹی اسپیکر قاسم خان سوری پارے کہ وونٹ انا طاقت الس ءِ اسہ مخلص سرکڑدہ اس پٹنگ نا حق ایتک۔ نن تینا ووٹر آتا کمک اٹ ملک ءِ گچین ءُ سرکڑدہ اس ترسا اودے اسہ روشنا آخبت اس تننگ کینہ۔ اوپارے کہ میڈیا غا لازم ءِ کہ او الس اٹ وونٹ انا اہمیت ءِ تالان کننگ اٹ تینا کڑد ءِ ادا کے۔
