اسلام آباد۔ 07 دسمبر (اے پی پی) نیشنل کمانڈ اینڈ آپریشن سینٹر نا دیوان اٹی صوبائی چیف سیکرٹریک ویڈیو لنک انا کمک اٹ بشخ ہلکر۔ دوشنبے نادے آ مروک آ دیوان اٹی فورم ءِ ملک اٹی کورونا مثبت کیس آتا کچ آن معلومدار کننگا، کورونا ایس او پی تا بابت اڈتروک آ ہفتہ کن بنجائی اکائی تا گام گیج و کورونا دین انا ارٹ میکو ریسہ ٹی اہم گرج آتا بابت جاچ ءِ ہلنگا۔ فورم ءِ پاننگاکہ تدوک آ اِراہفتہ غان ہڑدے ئی بنداو آ کروک آ کورونا ٹیسٹ آتا کچ 40 ہزار آن زیات ءِ۔ 81 درسد کورونا نا مثبت کیس بھلا شاری ہند آتیان رپورٹ مسنے۔ تدوک آ ہفتہ ٹی 40 درسدٹیسٹنگ کانٹکٹ ٹریسنگ نا پالیسی آ کننگا۔ مچ آ پاکستان اٹ 4 ہزار 503 سمارٹ لاک ڈاؤن خلنگانے دا سمارٹ لاک ڈاؤن تا نفاذ 15 لکھ 12 ہزار 903 بندغ آتیا اثرانداز مریک۔ فورم ءِ صوبہ غاتیٹی ایس او پی تیا عملدرآمد نا بابت حوال اٹی پاننگاکہ دادین انا توننگ کن جرمانہ و جاگہ غاتے سِیل کننگ تون اوار چندی انتظامی گام گیج کننگانے۔ فورم ءِ صوبہ غاتا کنڈآن ہفتہ ایس او پی نا رداٹ کروک آ گام گیج آتا بارواٹ پاننگا۔ فورم ءِ حوال اٹی پاننگاکہ ملک اٹی کورونا دین انا مثبت کیس آتا کچ 9.71 درسد ءِ۔ غٹ آن زیات مثبت کیس آتا کچ کراچی ٹی 21.31درسد مون آ بس، اوکان پد ایبٹ آباد اٹی 17.86 درسد و پشاور اٹی 16.66درسد ئس۔ فورم ءِ مستی پاننگاکہ مچ آ پاکستان اٹی کورونا نا 2 ہزار 539 ناجوڑ آتا حالیت نازرک ءِ و نازرک حالیت والا ناجوڑ آتا کچ ترندی اٹ ودنگ ءِ۔ صوبہ غاتیٹی کورونا نا مثبت کیس آتا کچ انا لحاظ اٹ آزاد جموں کشمیر اٹی 11.93درسد، بلوچستان اٹی 11.61درسد، گلگت بلتستان اٹی 2.89درسد، اسلام آباد اٹی 8.20درسد، خیبرپختونخوا 8.22 درسد، پنجاب 5.54درسد و سندھ اٹی 15.83درسد ءِ۔ صوبہ وار چندی شار تیٹی مثبت کیس آتا کچ انا لحاظ اٹ پنجاب نا چندی شار ہرافتیان لاہور 9.74درسد، راولپنڈی12.09درسد، فیصل آباد 5.28درسد، سندھ انا چندی شار تیٹی ہرافتیان کراچی ٹی 21.31درسد، حیدر آباد 14.00درسد، خیبرپختونخوا ٹی پشاور 16.66درسد، سوات 4.27درسد، ایبٹ آباد 17.86درسد، بلوچستان اٹی کوئٹہ ٹی مثبت کیس آتا کچ 7.05درسد، اسلام آباد اٹی مثبت کیس آتا کچ 8.20درسد ءِ۔ گلگت بلتستان اٹی گلگت اٹی مثبت کیس آتا کچ 9.09درسد ءِ۔ ہنداوڑاٹ مچ آ ملک اٹی کورونا نا ناجوڑ آتیکن جتا کروک وینٹی لیٹر آتا کچ انا بابت فورم ءِ حوال اٹی پاننگاکہ مچ آ ملک اٹی کورونا نا 322 ناجوڑ وینٹی لیٹر آتیا ٹی ءُ ہرافتیان پنجاب نا چندی شار ہرافتے ٹی فیصل آباد اٹی 3 ناجوڑ، لاہور اٹی 91 ناجوڑ، ملتان اٹی 45 ناجوڑ، راولپنڈی ٹی 19ناجوڑ وینٹی لیٹر آتیاٹی ءُ۔ حیدر آباد اٹی اسہ ناجوڑ اس ہم وینٹی لیٹر آ اف۔ کراچی ٹی 82 ناجوڑ وینٹی لیٹر آتیاٹی ءُ۔ ہنداوڑاٹ خیبرپختونخوا نا شار تیان ایبٹ آباد اٹی اسہ ناجوڑ اس ہم وینٹی لیٹر آ اف وخت اس کہ پشاور اٹی 43 ناجوڑ داوخت آ دین انا سوب آن وینٹی لیٹرآتیاٹی ءُ۔ ہنداوڑاٹ بنجائی دارالحکومت اسلام آباد اٹی کورونا نا 39 ناجوڑ وینٹی لیٹر آتیاٹی ءُ۔
