نیب انا دوبہ دار آتے سزا ترفنگ نا کچ 68.88 درسدءِ، چیئرمین نیب انا نیب ہیڈکوارٹر اٹی جاچ دیوان آن تران

اسلام آباد۔ 07 دسمبر (اے پی پی) چیئرمین نیب جسٹس جاوید اقبال نا کماشی ٹی نیب ہیڈکوارٹر اٹی اسہ بڑزکو کہول انا دیوان اس اڈ ہلک۔ دیوان اٹی ڈپٹی چیئرمین نیب، پراسیکیوٹر جنرل اکاؤنٹیبلیٹی، ڈی جی آپریشنز و ایلو بڑزکو آفیسر آک ساڑی ئسر۔ دیوان اٹی نیب انا جم کارکڑد نا جاچ ءِ ہلنگا۔ چیئرمین نیب پارے کہ ملک آن وڈی خوری نا چٹفنگ، وڈی خور زموار آتیان قوم انا پلوک آ پسیہ غاتا پدی ہلنگ، منی لانڈرنگ، واک آتا ناروا کاریم اٹ اتنگ و میگا کرپشن مقدمہ غاتے کانود نا رداٹ سائنسی بنداو تیا ایسر اسکان سرکننگ نیب انا اولیت ءِ۔ ہراڑکن غٹ وسیلہ غاتے کاریم اٹ اتنگ انگ ءِ۔ اوپارے کہ نیب انا تعلق ہچ ءُ سیاسی جماعت، گروہ و بندغ اسے تون اف بلکن ریاست پاکستان تون ءِ۔ نیب ملک آن وڈی خوری نا چٹفنگ کن احتساب غٹ اکن نا ہر پالیسی ءِ تینا کرینے اوناجوان ءُ بھرم اس مون آ بننگ بناکرینے۔ ہندا سوب ءِ کہ گیلانی اینڈ گیلپ سروے نا رداٹ 59 درسد الس نیب آ پت کیرہ۔ نیب اقوام متحدہ نا انسداد کرپشن کنونشن نا رداٹ پاکستان نا فوکل ادارہ ءِ۔ نیب سارک ملک آتا انسداد وڈی خوری نا ادارہ غاتیٹی رول ماڈل نا حیثیت ءِ ہراکہ پاکستان کن شرف نا ہیت اسے۔ چیئرمین نیب جسٹس جاوید اقبال پارے کہ نیب مقدمہ غاتے ترندی اٹ سرتننگ کن غاوتا جانچ پڑتال، انکوائری و انویسٹی گیشن کن 10 تُو انا وخت مقرر کننگانے۔ داکان بیدس سینئر آفیسر آتا اجتماعی دانش آن فائدہ ہرفنگ کن ڈائریکٹر جنرل، ایڈیشنل ڈائریکٹرو ڈائریکٹر آ تالان اسیجائی پٹ وپولی ٹیم انا نظام اس وضع کننگانے۔ داکان بیدس تین پہ تینی سلابت اٹ کانود نا رداٹ فیصلہ سازی کن ایگزیکٹو بورڈ و ریجنل بورڈ ٹہیفنگانے وخت اس کہ ادارہ جاتی کارکڑد ءِ پین گچین کننگ کن مقداری و آب اٹ گریڈنگ نا نظام اس وضع کننگانے۔ ہرانا جوان ءُ بھرم اس مون آ بننگ ءِ۔ چیئرمین نیب جسٹس جاوید اقبال پارے کہ نیب انا کارکڑد و کچ ءِ پین گچین کننگ کن تینا انویسٹی گیشن آفیسر و پراسیکیوٹر آتا پوسکن آ وڑوڈول و ساڑی آ دور انا خواست آتے مون آ تخسا تربیت ءِ نئے بیرہ بھاز اہمیت ایتک بلکن آفیسر آتا پوسکن وڑوڈول تیا تربیت و کاریم نا کچ ءِ ودفنگ کن ہیلکاری پروگرام ترتیب تننگانے۔ ہرافتا مسخت نیب انا انویسٹی گیشن آفیسر و پراسیکیوٹر آتا لائخی تے ودفنگ ءِ۔ اوپارے کہ نیب انا آفیسر آک ملک آن وڈی خوری نا چٹفنگ ءِ تینا قومی فرض سرپند کیرہ، غاوتا کچ اٹ ودکی ہم الس نا نیب آ پت انا درشانی ءِ۔ نیب راولپنڈی ٹی پوسکن فرانزک سائنس لیبارٹری اس جوڑ کرینے ، دالیبارٹری ٹی ڈیجیٹل فرانزک، سوالیہ دستاویزو فنگر پرنٹ نا جاچ انا آسراتی ساڑی ءِ تانکہ انویسٹی گیشن آفیسر و پراسیکوٹر کانود نا رداٹ تخوک آ وخت اٹ مقدمہ غاتا جاست وپاست نا رداٹ فرانزک لیبارٹری نا آسراتی تیان فائدہ ہرفنگ کیر۔ نیب انا دوبہ دار آتے سزا ترفنگ نا کچ 68.88 درسد ءِ ہراکہ ایلو انسداد وڈی خوری نا ادارہ غاتیٹی غٹ آن زیات ءُ۔ ہنداسوب ءِ کہ نیب انا کارکڑد انا اعتراف ءِ معتبر قومی و جہانی ادارہ غاک کرینو۔