اسلام آباد۔ 07 دسمبر (اے پی پی) وزیراعظم نا سلاہکار خزانہ و محصولات ڈاکٹر عبدالحفیظ شیخ کوڑی کننگ نا چٹفنگ و المی آ گڑاتا نہاد آتے سوگو تخنگ کن غٹ صوبائی حکومت آتے المی گام گیج کننگ نا پارت کرینے۔ داہیت ءِ او دوشنبے نادے آ داڑے نیشنل پرائس مانیٹرنگ کمیٹی نا دیوان نا کماشی ءِ کرسا پارے۔ وزیراعظم نا سلاہکار خولم نا گچین فراوانی نا کمک اٹ نہاد آتا مون ءِ توننگ کن صوبائی حکومت آتا گام گیج آتا ستاءِ کرے۔ دیوان اٹی بنجائی وزیر صنعت و پیداوار حماد اظہر، پاکستان بیورو شماریات، وزارت واپار وزارت قومی غذائی رکھ، ٹریڈنگ کارپوریشن آف پاکستان، پاکستان کسٹمز، کابینہ ڈویژن، صوبائی حکومت و اسلام آباد کیپیٹل ٹیریٹوری انتظامیہ نا نمائندہ غاک ساڑی ئسر۔ ڈاکٹر عبدالحفیظ شیخ ای سی سی نا کنڈآن جوڑ لاجسٹک کمیٹی ءِ مچ آ ملک اٹی خولم نا فراوانی نا حالیت آتیان اوفتے باقاعدہ بنداو تیا معلومدار کننگ نا پارت کرے۔ ڈاکٹر عبدالحفیظ شیخ پارے کہ ہرحالیت اٹ ایشو مون آ بننگ نا حالیت اٹ او ہروڑنا کمک کن تیار ءِ۔ ڈاکٹر عبدالحفیظ شیخ خولم و بورہ نا نہاد آتیٹی کمتی نا عمومی رجحان آ است جمی نا درشانی ءِ کرے و پارے کہ حکومت و تعلقدار ادارہ غاتا کوشست آتیان خولم و بورہ نا نہاد آتیٹی کمتی مون آ بسنے۔ سیکرٹری خزانہ نوید کامران بلوچ دیوان نا بشخ ہلوک آتے مچ آ ملک اٹی المی آ گڑاتا نہاد آتا حالیت آتا بارواٹ معلومدار کرے۔ اوپارے کہ تدوک آ ہفتہ ٹی ہر بندغ کن نہاد آتا حساس ٹک اٹ 0.23 درسد نا کمتی ریکارڈ کننگانے۔ اوپارے کہ تدوک آ ہفتہ ٹی سینزدہ المی آ گڑاتا نہاد آتیٹی کمتی وخت اس کہ 21 گڑاتا نہاد آتیٹی سوگوی مون آ بسنے۔ اوپارے کہ مچ آ ملک اٹی فلور مل آتے خولم نا فراوانی ٹی ودکی کننگانے۔ اوپارے کہ فلور مل آتے خولم نا ہڑدے ئی فراوانی 44000ہزار میٹرک ٹن کننگانے۔ کانود و ضابطہ غاتا پاسداری کپروک آ مل آتا برخلاف گام گیج آتا چرجوئی برجاءِ۔ دیوان ءِ پاننگاکہ چکن و سُو انا نہاد آتیٹی ہرا ودکی مننگ ءِ او خواست و رسینگ نا نیام اٹ پرخ انا سوب آن ءِ، داکان بیدس موسمیاتی سوب ہم ارے۔ دیوان ءِ پاننگاکہ چکن و سُو انا نہاد آتیٹی کمتی کن شعبہ تون گنڈوک بندغ آتون رابطہ کننگانے۔ داکان بیدس صوبائی حکومت آتے پارت جاری کرینن تانکہ نہاد آتے جوان ءُ کہول اسے آ تخنگ مرے۔ وزارت صنعت و پیدوار نا کنڈآن دیوان ءِ پاننگاکہ مچ آ ملک اٹی بورہ نا فراوانی ٹی ودکی کننگانے ہرانا سوب آن نہاد آتیٹی پدریسہ کمتی بننگ ءِ۔ دیوان ءِ پاننگاکہ یوٹیلیٹی اسٹور تے خولم و بورہ نا گرج آتا چرجوئی ٹی پاسکو و ٹریڈ ڈویلپمنٹ کارپوریشن تون رابطہ ٹی اُن تانکہ اوفتا گرج آتے پورو کننگ مرے۔
