اسلام آباد۔ 07 دسمبر (اے پی پی) وزیراعظم عمران خان ءِ ڈائریکٹر جنرل اینٹی نارکوٹکس فورس میجر جنرل محمد عارف ملک منشیات اسمگلنگ نا توننگ و اے این ایف نا گام گیج آتا بابت بریفنگ تس۔ دوشنبے نادے آ وزیراعظم عمران خان اینٹی نارکوٹکس فورس ہیڈکوارٹر راولپنڈی نا دورہ ءِ کرے۔ وزیراعظم آفس نا میڈیا ونگ آن جاری بیان نا رداٹ بنجائی وزیر انسداد منشیات اعظم خان سواتی و ڈی جی اے این ایف میجر جنرل محمد عارف ملک، ہلال امتیاز(ملٹری) وزیراعظم ءِ بخیر کریر۔ وزیراعظم یات گار شہداء آ پھل شاغا و دعاپاتیا کرے اوکان پد او اے این ایف نا پوسکن آ ماڑی نا بناءِ کرے۔ وزیراعظم اے این ایف ہیڈکوارٹرز نا ماڑی نا دورہ ءِ ہم کرے۔ ڈی جی اے این ایف وزیراعظم ءِ منشیات نا اسمگلنگ نا توننگ نا بابت کروک آ اے این ایف نا آپریشن تا بارواٹ سرجم حوال تس۔ حوال اٹی ڈی جی اے این ایف وزیراعظم ءِ منشیات نا جہانی و علاقائی حالیت و راج آ اونا مضر اثرات، اے این ایف نا حکمت عملی و منشیات آن پاک راج انا ٹہیفنگ ءِ پک کننگ، مون تروک ویل و فورس انا محکمانہ شونداری وشونہالی نا ڈٹ سازی نا بارواٹی معلومدار کرے۔ وزیراعظم سال 2019 و 2020ء ٹی منشیات نا ریکارڈ مقدار کوزہ ٹی ہلنگ آ اے این ایف نا کوشست آتا ستاءِ کرے۔ وزیراعظم اے این ایف نا بڑزکو آفیسر، پاکستان اٹی ساڑی چندی ملک آتا ڈرگ لیزان آفیسر و اے این ایف نا یوتھ ایمبیسیڈرآن تران کرسا پارے کہ منشیات نا پیدوار و بہاٹی اوار زموار ملک و راج اکن بھلو خطرہ اسے و منشیات نا اسمگلنگ اٹ اوار زموار آتون سختی اٹ مون تننگ المی ءِ۔
