راولپنڈی۔ 07 دسمبر (اے پی پی) وزیراعظم عمران خان پارینے کہ نشہ نا کینسر نا برخلاف مچ آ ملک اٹی تحریک چلیفنگک و پوسکن آ چین ءِ بچفنگ کن راج ءِ اواری اٹ منشیات، ڈوہ و وڈی خوری تون جنگ تروئی ءِ، ملک اٹی 70 لکھ ورنا منشیات نا لعنت نا گواچی ءُ، اسکول آتا چناک ہم دانا عادتی مننگ ءُ۔ داخیال آتا درشانی ءِ او دوشنبے نادے آ دورہ اینٹی نارکوٹکس(انسداد منشیات) فورس انا ہیڈکوارٹرز اٹی دود آن تران کرسا کرے۔ وزیراعظم پارے کہ اوغان جہاد آن پد ملک اٹی منشیات نا لعنت دربس، داویل ءِ سنجیدگی اٹ ہلنگتو انتئے کہ خیال دائس کہ داڑآن پاکستان نا نسخان مفننگ ءِ ولے ہراگڑا قرآن خراب پارینے او راج ءِ نسخان ایتک۔ منشیات آن پیسہ جوڑ کروک آتے راج اٹ خراب سرپند کننگتوکہ و اوفک قابل قبول ئسر، دابدبختی ئس ، ناروا وڑوڈول، کرپشن و منشیات آن دوئی مروک آ پیسہ غاک پاکستان ءِ نسخان تسر۔ داپیسہ غاک سیاست و کرپشن ءِ مون آ دننگ کن کاریم اٹ اتنگار۔ وزیراعظم پارے کہ ملک اٹی 70 لکھ ورناتا نشہ غاتا عادتی مننگ بھاز گڑتی نا سوب ءِ، داداخہ در بھلو کچ اسے کہ نیوزی لینڈ و سنگاپور تون اوار کیہی ملک آتا آبادی ہم داڑآن کم ءِ۔ اوپارے کہ اسہ اُراسے ٹی ہراتم اسہ بندغ اس منشیات اٹ اختہ مریک تو اونا سوب آن نئے بیرہ او بلکن اونا مچ آ اُراتباہ مریک۔ نشہ نا سوب آن تینا زائیفہ و چناتسکان ءِ نسخان ایترہ و تینا خاہوت آتے تباہ و برباد کیرہ۔ راج اٹ منشیات نا کینسر ترندی اٹ تالان مننگ ءِ۔ سنتھیٹک ڈرگز منشیات نا پوسکن ءُ دروشم اسے ہرا اسکول و تعلیمی ادارہ غاتیٹی ہم تالان مسنے۔ داوڑنا چناک نئے تو تعلیم کننگ کیرہ و نئے زند انا جہد اٹ مون آ ہِننگ کیرہ۔ چنک وئی اٹ منشیات نا کاریم اٹ اتنگ آن اودے ہلنگ پین مشکل مریک۔ وزیراعظم پارے کہ بیرہ اے این ایف منشیات ءِ توننگ کپک، پولیس و کانود نافذ کروک آ ادارہ غاک ڈوہ اتون تنیا مون تننگ کپسہ، مچ آ راج ءِ اواری اٹ منشیات، ڈوہ وکرپشن تون جنگ تروئی ءِ۔ بیرہ نیب یا ایلو ادارہ غاک گچینی اتنگ کپسہ۔ ہر راج ڈوہ، منشیات و کرپشن نا اجتماعی کوشست آتا کمک اٹ ءِ توننگ کیک۔ وزیراعظم سنگاپور و امریکہ نا درور ءِ تس ہراڑے کرپشن ءِ سگنگپننگک و راج اودے امنا کپک۔ وزیراعظم راج آ زور شاغا کہ منشیات و کرپشن نا برخلاف اواری اٹ جنگ ایتر۔ اوپارے کہ حکومت غٹ تعلقدار وزارت آتیا تالان کونسل اس ٹہیفک تانکہ جان جوڑی، تعلیم تون اوار چندی وزارت آک راجءِ منشیات آن پاک کننگ و ورناچین ءِ بچفنگ کن تینا تینا کڑد ءِ ادا کیر۔ وزیراعظم باوری کرفے کہ وسیلہ غاتے مون آ تخسا اے این ایف اٹی نفری نا کچ ءِ ودفنگ کن غٹ المی گام گیج کننگک و تعلقدار وزارت آتے ہم متحرک کننگک۔ منشیات نا برخلاف مچ آ ملک اٹی تحریک چلینگے و اواری اٹ داڑتون جنگ ایتنہ۔ داوخت آ بنجائی وزیر انسداد منشیات اعظم سواتی، ڈی جی این ایف و تعلقدار کمامدارآک ہم ساڑی ئسر۔ داکان مست وزیراعظم عمران خان اینٹی نارکوٹکس(انسداد منشیات) فورس انا ہیڈکوارٹرز نا پوسکن آ ماڑی نا بناءِ کرے۔ یات گار شہداء آ چادر شاغا و خراج عقیدت پیش کرے۔
