اسلام آباد۔ 04 دسمبر (اے پی پی) وزیراعظم عمران خان ریڈیو اسکول و ای تعلیم پورٹل نا بناءِ کرے وخت اس کہ وزیراعظم پارے کہ اسہ نصاب اس اسہ قوم اس جوڑ کیک، دینی مدرسہ غاتے قومی دنگ اٹ اتنگ اسہ اہم ءُ خذمت اسے۔ جمعہ نادے آ وزیراعظم ریڈیو اسکول و اسہ تعلیم پورٹل نا بناءِ کرے، ریڈیو اسکول نا ڈٹ وزارت حوالکاری و وزارت تعلیم نا شریداری اٹ بناکننگانے۔ داڑآن ملک انا مُر مُر انگا علاقہ غاتیٹی ہم کورونا دین انا سوب آن معطل مروک آ تعلیمی چرجوئی ءِ بحال تخنگ مریک۔ دود اٹی وزیرتعلیم شفقت محمود، وزیر حوالکاری سینیٹر شبلی فراز، پارلیمانی سیکرٹری تعلیم وجیہہ اکرم و ایلو بڑزکو عہدیدار آک بشخ ہلکر۔ داوخت آ وزیراعظم عمران خان پارے کہ مچ آ دنیا داوخت آ کورونا نا سوب آن مشکل آتا گواچی ءِ، دا سوب آن تعلیمی عمل ہم زہمی مسنے۔ وزیراعظم پارے کہ ای وزارت تعلیم و وزارت حوالکاری ءِ مبارکباد پیش کیوہ کہ اوفک تعلیم نا چرجوئی ءِ برجاتخنگ کن خاطرخواہ گام گیج کرینو ہرافتیان تعلیمی عمل آ دین انا سوب آن تموک آ منفی زہم تیٹی کمتی واقع مریک۔ وزیراعظم پارے کہ داعمل اٹ پوسکن آ ٹیکنالوجی نا کاریم اٹ اتنگ ستاکڑزک۔ داڑآن مُر مُر انگا علاقہ غاتیٹی آب اٹ تعلیم سرکننگ اٹ کمک رسینگک۔ وزیراعظم پارت کرے کہ داسہ ننے خصوصی وڑاٹ مُر مُر انگا علاقہ غاتیٹی استاد آتا تربیت آ چکار کروئی مریک ہراڑآن ہمو علاقہ غاتا تعلیمی آب اٹ گچینی بریک۔ وزیراعظم پارے کہ اسہ وڑ نصاب وزارت تعلیم نا اسہ بھاز بھلو سرسہبی و انقلابی گام اسے۔ داڑآن شیفکو تپہ ءِ ہم تعلیم و مون آ ہِننگ نا اسہ وڑ وارخواہی دوبریک۔ وزیراعظم نیشنل ایجوکیشن پالیسی ءِ ہم زوت آن زوت پورو کننگ ناپارت کرینے۔ وخت اس کہ فنی تعلیم ہم بھاز المی ءِ۔ وزیراعظم پارے کہ ای گورنمنٹ کالج نا اولیکو پرنسپل نا کتاب نا مطالعہ کریٹ ہراٹی او نوشتہ کرینے کہ ہژدہ سد ءُ پنجا ءُ ہفت آن پد امر انگریز آک مسلمان تا تعلیم نظام ءِ بھس کریر۔ہمووخت آ دینی مدرسہ غاتیٹی ہندو و سکھ ہم تعلیم حاصل کریرہ وخت اس کہ داڑے پوسکن آ علم ءِ خوانفنگاکہ ولے اوکان پد دینی مدرسہ غاتے آئیسولیٹ کننگا۔ وزیراعظم پارت کرے کہ بنجائی دارالحکومت اسلام آباد ءِ تعلیم نا بابت ماڈل جوڑ کننگے۔ وزیراعظم پارے کہ ساڑی آ تعلیمی نظام ءِ شیفکو تپہ ءِ بڑز بننگ آن تورک وخت اس کہ اوفتا لائخی تے محدود کیک۔ حوال اٹی پاننگاکہ ای تعلیم پورٹل نا مون آ دننگ کن آگاہی مہم اٹی ‘‘فیس بک ’’ وزارت تعلیم و کسبی تربیت تون شریداری کننگ ءِ۔ دامہم نا مسخت الس ءِ ‘‘ای تعلیم پورٹل’’ و داڑآ ساڑی آ تعلیمی مواد آن معلومدار کننگ ناءِ تانکہ طالب علم و لمہ و باوہ وڑاٹ فائدہ ہرفنگ کیر۔
