کوئٹہ۔ 04 دسمبر (اے پی پی) بلوچستان زرکاری بورڈ انا کنڈآن یورپی یونین نا کمکاری آن اولیکو وار ‘‘بلوچستان زرکاری پالیسی’’ تیار کننگانے و دانا مسودہ ءِ حتمی دروشم اس تننگانے۔ پالیسی مرتب کننگ اٹ غٹ کانودی پلو آتے مون آ تخسا تعلقدار فورم و اسٹیک ہولڈر آتا سلاہ تے ہم اوار کننگانے، پالیسی نا منظوری و نافذ کننگ آن مست اونا مسودہ ءِ پین گچین و بھرمی کننگ کن بلوچستان زرکاری بورڈ انا کنڈآن چارشنبے نادے 9 دسمبر آ ہندی ہوٹل اٹی اسہ سلابتی دیوان اس اڈتننگک دا دیوان یورپی یونین نا پروگرام (پی ایف ایم 2) نا گائیڈ لائن نا رداٹ اڈتننگ انگ ءِ ہراٹی غٹ اسٹیک ہولڈر آتے داپالیسی آ غور و سلاہ پیش کننگ کن سلہ خلنگک، دیوان اٹی بنجائی ادارہ، صوبائی محکمہ، چیمبر آف کامرس نا نمائندہ غاتون اوار کانودی چاہندار و ایلو اسٹیک ہولڈر آک بشخ ہلیرہ ، بلوچستان زرکاری بورڈ انا چیف ایگزیکٹو فرمان زرکون بلوچستان زرکاری پالیسی ءِ اسہ انقلابی گام گیج اس گوندسا پارے کہ بلوچستان ملک انا اسٹ انگا و اولیکو صوبہ ءِ ہرا تینا زرکاری پالیسی اس اتنگ ءِ ۔ داپالیسی نا نافذ کننگ آن نئے بیرہ صوبہ ٹی پیشن نا زرکاری نا کسر آوار مریک بلکن زرکاری و بزنس نا کسر اٹ بروک آ اڑاند آک مُر مریرہ، وزیراعلیٰ جام کمال خان نا کماشی ٹی صوبائی حکومت زرکاری نا مون آ دننگ کن کیہی تاریخی گام گیج کرینے ہرافتا بھرم ملنگ بناکرینے۔ زرکاری پالیسی ہم دا چرجوئی نا اسہ کڑی اسے ہرا صوبہ نا شونداری و شونہالی کن اہم مریک و داڑے واپاری و زرگزرانی سرجزآتے مون آ دننگ دوئی مریک۔
