صدر مملکت ڈاکٹر عارف علوی نا کماشی ٹی ایوان صدر اٹی خصوصی بندغ آتا مالیاتی اوار مننگ نا بابت دیوان

اسلام آباد۔ 04 دسمبر (اے پی پی) صدر مملکت ڈاکٹر عارف علوی خصوصی بندغ آتیکن مالیاتی شمولیت ءِ پک کننگ نا اہمیت آ زور شاغسا پارے کہ دا اوفتے مالی وڑاٹ واکدار کننگ و ملک انا راجی و اقتصادی شونداری ٹی اوفتا کڑد ءِ ودفنگ کن بھاز المی ءِ۔ او جمعہ نادے آ داڑے ایوان صدر اٹی خصوصی بندغ آتا مالیاتی شمولیت نا بابت اڈہلوک آ دیوان نا کماشی ءِ کریکہ۔ دیوان اٹی وزیراعظم نا خصوصی کمکار تخفیف نیزگاری و راجی رکھ ڈاکٹر ثانیہ نشتر، گورنر اسٹیٹ بینک ڈاکٹر رضاباقر، پاکستان بینکس ایسوسی ایشن نا چیئرمین وحبیب بینک انا صدر محمد اورنگزیب و ملک انا 27 بھلا بینک آتا صدر و سی ای اوز ویڈیو لنک انا کمک اٹ بشخ ہلکر۔ دیوان آن تران کرسا صدر مملکت پارے کہ خصوصی بندغ آک راج انا نزور تپہ ءُ، اوفتے آسراتی تا فراوانی و زرگزرانی بہبود کن کاریم کننگ مچ آ راج انا اسیجائی زمواری ءِ۔ اوخصوصی بندغ آتا مالیاتی شمولیت ءِ ودفنگ نا گرج آ زور شاغسا پارے کہ اوفتیکن ہن و بر و رسینگ ءِ آسان کننگ نا چرجوئی ٹی گام گیج کننگے۔ وزیراعظم نا خصوصی کمکار تخفیف نیزگاری راجی رکھ ڈاکٹر ثانیہ نشتر دیوان ءِ خصوصی بندغ آتا راجی آسراتی کن کروک آ گام گیج آتا بارواٹی معلومدار کرے۔ اسٹیٹ بینک انا گورنر دیوان ءِ فروری 2020ء ٹی چندی بینک آتا صدر و چیف ایگزیکٹو آفیسر آتون اڈ ہلوک آ دیوان اٹی کروک آ فیصلہ غاتیا عملدرآمد نا حالیت آتا بارواٹ حوال تس۔ اودیوان ءِ خصوصی بندغ آتا راجی و آسراتی کن اسٹیٹ بینک آف پاکستان نا کنڈآں کروک آ گام گیج آتا بارواٹی پارے آیا کہ اسٹیٹ بینک آف پاکستان ملک انا غٹ بینک و مائیکرو فنانس بینک آتے پابند کرینے کہ خصوصی بندغ آتا آسراتی کن ریمپیس تعمیر کننگے  و بینک آتا ماڑی تیٹی اوفتا آسانی رسینگ ءِ پک کننگے۔ اوپارے کہ اسٹیٹ بینک آف پاکستان ری فنانس سکیم تا بابت بینک آتیکن ہدف مقرر کرینے و اوفتے پارت کرینے کہ اِراسال نا تہہ ٹی غٹ بینک آتا داخلی کسر تیا ریمپس نا تفنگ ءِ پک کننگے۔ اوپارے کہ بینک، ایس ای سی پی و خصوصی بندغ آتا نمائندہ غاتیا تالان ورکنگ پڑک اس ٹہیفنگک ہرااوفتا زرگزرانی وتواجہی و راجی آسراتی کن سلاہ و سوج پیش کیک۔ حبیب بینک انا صدر و پاکستان بینکنگ ایسوسی ایشن نا چیئرمین محمد اورنگزیب دیوان ءِ خصوصی بندغ آتا آسراتی کن کروک آ گام گیج آتا بابت معلومدار کرسا پارے کہ 525 برانچ آتیٹی آسان انفراسٹرکچر رسینگ نا بست و بند ءِ کننگانے وخت اس کہ 1100 خصوصی بندغ آتے مالیاتی کمک فراوان کننگانے۔