کوئٹہ۔ 04 دسمبر (اے پی پی) چیف سیکرٹری بلوچستان کیپٹن(ر) فضیل اصغر نا کماشی ٹی کورونا دین انا توننگ و محکمہ جان جوڑی ٹی گچینی نا بابت دیوان اس اڈ ہلک ہراٹی حکومت نا کنڈآن تروک آ ایس او پی تیا عملدرآمد ءِ پک کننگ و صوبہ نا ہسپتال آتیٹی جان جوڑی نا گچین آسراتی تا فراوانی نا بابت امور نا جاچ ءِ ہلنگا۔ دیوان اٹی ایڈیشنل چیف سیکرٹری داخلہ حافظ عبدالباسط، سیکرٹری جان جوڑی نورالحق بلوچ، سپیشل سیکرٹری جان جوڑی محمد حیات کاکڑ، بی سی او سی نا تھنک ٹینک ، ڈویژنل کمشنرز بذریعہ ویڈیو لنک و ایلو تعلقدار کمامدارآک بشخ ہلکر۔ چیف سیکرٹری دیوان نا بشخ ہلوک آتیان تران کرسا پارے کہ کورونا دین انا ارٹ میکو ریسہ خطرناک ءِ و اگہ مخلوق دا ناجوڑی ءِ سنجیدگی اٹ ہلتو تو بھلو بھس کاری نا سوب اس مننگ کیک، اوپارے کہ صوبائی حکومت دانا توننگ و ایس او پی تیا عملدرآمد ءِ پک کننگ کن غٹ دوئی وسیلہ غاتے کاریم اٹ اتنگ ءِ۔ اوپارے کہ گرج داہیت انا ءِ کہ غٹ تعلقدار ادارہ غاک غٹ تپہ و مکاتب فکر اواری اٹ مون تروک حالیت آتون جوان وڑاٹ مون تننگ اٹ تینا فعال و متحرک کڑد ءِ ادا کیر انتئے کہ دا بیرہ اسہ صوبہ نا آخا بلکن مچ آ ملک انا ویل ءِ۔ داحالیت آتیٹی لس مخلوق اٹ ماسک بیننگ نا بارواٹ آگاہی ودی کننگے۔ اوشادی ہال تیٹی پیک کُن و خور، شاپنگ مال و پبلک ٹرانسپورٹ اٹی مخلوق ءِ ماسک بیننگ آ سختی اٹ عملدرآمد نا ہم پارت کرے۔ چیف سیکرٹری پارے کہ صوبائی حکومت محکمہ جان جوڑی ٹی گچینی اتنگ نا ہم خواہش مند ءِ اودا چرجوئی ٹی سیکرٹری جان جوڑی ءِ پارت کرے کہ اسہ کمیٹی اس جوڑ کننگے ہراٹی او محکمہ ٹی گچینی اتنگ کن سلاہ پیش کیک۔ اوپارے کہ صوبائی حکومت الس ءِ اوفتا درگہ غا جان جوڑی نا آسراتی فراوان کننگ کن گام گیج کننگ ءِ۔ اوپارے کہ ہسپتال آتیٹی تعمیر و جوڑجاڑ تون اوار اوار دوائی تا فراوانی ءِ ہم پک کننگے۔
