اسلام آباد۔ 04 دسمبر (اے پی پی) اسپیکر قومی اسمبلی اسد قیصر نا کماشی ٹی خیبرپختونخوا ٹی سی پیک نا رداٹ برجا ڈٹ آتیا بڑزکو کہولی دیوان اس جمعہ نادے آ اڈ ہلک۔ دیوان اٹی وزیر اعلیٰ خیبرپختونخوا محمود خان، بنجائی و صوبائی وزیر آتیٹی پرویز خٹک، اسد عمر، علی امین گنڈاپور، تیمور سلیم جگڑہ و تعلقدار محکمہ غاتا سیکرٹریک ساڑی ئسر۔ دیوان اٹی خیبرپختونخوا ٹی سی پیک نا رداٹ برجا ڈٹ آتا بابت سرجم گپ وتران کننگا۔ دیوان اٹی سی پیک نارداٹ برجا ڈٹ آتا زوت پوروی کن تعلقدار کمامدارآتے کاریم ءِ ترند کننگ نا پارت کننگا۔ رشکئی اکنامک نا بناء آ سرجم گپ وتران کننگا۔ دیوان اٹی رشکئی اکنامک زون نا زوت بناءِ کننگ نا گرج آ زور شاغنگا۔ ڈی آئی خان اکنامک زون آہم سرجم گپ وتران کننگا۔ ڈی آئی خان اکنامک زون ءِ اسپیشل صنعتی زون اس جوڑ کننگ آ سجفنگا۔ دیوان اٹی وزیر دفاع پرویز خٹک نا کماشی ٹی اسٹرنگ کمیٹی اس ٹہیفنگ آ امنا کننگا ہراٹی علی امین گنڈاپور، اسد عمرفیصل واوڈا، مراد سعید تیمور سلیم جھگڑہ اے سی ایس کے پی اوار ءُ۔ کمیٹی چشمہ رائٹ بینک کینال و چک درہ ہائی وے و ڈی آئی خان موٹروے آ کاریم ءِ مانیٹر کیک۔ کمیٹی ٹی سی پیک نا رداٹ برجا غٹ ڈٹ آتیا سرجم گپ وتران مس و آخبت نا لائحہ عمل آ سجفنگا۔
