اسلام آباد۔ 04 دسمبر (اے پی پی) کورونا کوویڈ۔ 19 نا دین انا رداٹ اقوام متحدہ نا جنرل اسمبلی نا 31 می خصوصی دیوان آن ویڈیو لنک انا کمک اٹ ورچوئل تران کرسا وزیراعظم عمران خان کورونا دین انا اثرآتون مون تننگ کن 10 ٹکی ایجنڈا ءِ پیش کرسا پارینے کہ کورونا دین انا چٹفنگ اسکان پدتموک ملک آتا وام تے موخر کننگے، پسماندہ ملک آتا وام تے معاف کننگے، وزیراعظم عمران خان تینا پیش کروک ایجنڈا ٹی پدتموک ملک آتا وام تا ری سٹرکچرنگ نا خواست ہم کرے۔ اوپارے کہ پنچ سد ارب ڈالر نا خصوصی فنڈ جتا کننگے ہراڑآن کم شون ہلوک ملک آتے رعایتی وام تا اآسراتی تننگے و داڑتون کم شرح آ گونڈ وختی وام فراوان کننگے۔ اوپارے کہ شونداری ٹی کمکاری نا بابت وعدہ غاتیا عملدرآمد ءِ پک کننگے و انفراسٹرکچر نا بشخ اٹی سالانہ پانزدہ کھرب ڈالر نا زرکاری کننگے، پدتموک ملک آتیان زر انا غیر کانودی انخلاء ءِ توننگ کن دمدستی گام گیج مرے۔ اوپارے کہ وڈی خور سیاست دان و ڈوہدار بندغ آتا پلوک آ دولت ءِ واپس کننگے و کورونا دین انا مون ءِ توننگ کن ننے اسیجائی کوشست کروئی مریک۔ زرگزرانی سیکورٹی و جھیڑہ غاتا چٹفنگ کن اقوام متحدہ نا چارٹر آ عملدرآمد ءِ پک کننگے۔
