اسلام آباد۔ 04 دسمبر (اے پی پی) وزیراعظم عمران خان پارینے کہ کورونا دین انا اثرآتون مون تننگ کن 10 ٹکی ایجنڈا ءِ پیش کرسا پارینے کہ کورونا دین انا مون ءِ توننگ کن اسیجاکوشست کروئی مریک، پدتموک ملک آتیکن ری سٹرکچرنگ کننگے، پنچ سد ارب ڈالر نا خصوصی فنڈ اس قائم کننگے۔ پسماندہ ملک آتا وام تے بشخنگے، جہانی مالیاتی نظام نا اول سر آن تفنگ نا گرج ءِ، وڈی خور سیاست دان و ڈوہدار بندغ آتا کنڈآن پلوک آ دولت ءِ واپس کننگے، زرگزرانی سیکورٹی و جھیڑہ غاتا چٹفنگ کن اقوام متحدہ نا چارٹر آ عملدرآمد ءِ پک کننگے، پاکستان کورونا دین انا حالیت آتون مون تننگ کن 8 ارب نا ریلیف پیکج تس و سمارٹ لاک ڈاؤن نا سرسہب پالیسی آ عمل کرے، کورونا دین 15 لکھ بندغ آتا جان تے ہلکونے، ویکسین ہر اسٹ کن میسرمرے، کورونا دین انا مون ءِ توننگ کن اسیجائی کوشست کروئی مریک، وڈی خور سیاستدان و ڈوہدار بندغ آتا پلوک آ دولت ءِ پدی کننگے۔ داخیال آتا درشانی ءِ او پنچ شنبے نادے آ کورونا دین انا زہم آتا جاچ ءِ ہلنگ و زرگزرانی نسخان تیا چکار کننگ کن اقوام متحدہ نا جنرل اسمبلی نا ورچوئل دیوان آن ویڈیو لنک انا کمک اٹ تران کرساکرے۔ وزیراعظم پارے کہ دا خصوصی دیوان نا اڈتننگ نا سلاہ تننگ آ غیر وابستہ تحریک نا چیئرمین و آذربائیجان نا صدر الہام علیوف نا منت وار اُن، کورونا دین ارٹ میکو جنگ عظیم آن پد غٹ آن بھلا جہانی تنکی ءِ، دا دین آن کم و ود شش کروڑ پنجا لکھ بندغ زہمی و 15 لکھ انا خڑک بندغ زوال کرینو۔ اوپارے کہ اوپارے کہ کورونا ویکسین ہر اسٹ کن میسر مرے۔ کورونا دین انا سوب آن مخلوق نا مشکل آتیٹی بھاز زیات مسنو۔ 1930ء آن پد کورونا نا سوب آن غٹ آن بھلا زرگزرانی بدحانی تون مون تروئی تمانے۔ دا دین آن نیزگار انگا ملک و غٹ ملک آتیٹی رہینگوک آ غریب بندغ آک غٹ آن زیات زہمی مسر۔ اوپارے کہ پدتموک ملک آتیٹی کم و ود دہ کروڑ بندغ کورونا نا سوب نیزگاری نا شیفکو کہول اسکان کارہ۔ وزیراعظم پارے کہ ہزگار ملک آک تینا زرگزران تے سنبھالنگ کن 13 ٹریلین ڈالر خڑچ کریر وخت اس کہ ایلو کنڈآ پدتموک ملک آتون زرگزران ءِ سنبھالنگ کن وسیلہ اف۔ پدتموک ملک ارٹ آن مسٹ ٹریلین ڈالر نا ہم بندوبست ءِ کپننگ ءُ۔ اوپارے کہ پاکستان سمارٹ لاک ڈاؤن نا سرسہب پالیسی آ عمل کرے۔ اوپارے کہ نن نئے بیرہ مخلوق ءِ دین آن بچفنگ بلکن اوفتے نیزگاری آن کہینگ آن بچفنگ کن کوشست کرینن و نن کم و ود 8 ارب ڈالر نا ریلیف پیکج تسونن ہراکہ ننا جی ڈی پی نا کم و ود مسہ درسد ءِ و دانا مسخت نیزگار آتا کمک ءِ کننگ و زرگزران ءِ سوگو تخنگ ئس۔ اوپارے کہ داسہ نننے کورونا دین انا ارٹ میکو ترند ریسہ نا مون تروک ءِ ہرانا نن پبی وڑاٹ مقابلہ ءِ کننگ اُن و ننے تینا زرگزرانی شرح نمو نا بحالی و اودے برقرار تخنگ تون اوار اوار کورونا نا ناجوڑ آتا کچ اٹ ودوک آ چیلنج مون تروک ءِ ہرانا سوب آن ننا ہسپتال آتیا دباؤ ودنگ ءِ۔ وزیراعظم پارے کہ آئی ایم ایف نا منیجنگ ڈائریکٹر زرگزرانی سوگوی کن زیات آن زیات درکار فنڈ خڑچ کننگ نا گرج آ زور شاغانے ولے بھاز انگا پدتموک ملک آتیانبار پاکستان آئی ایم ایف پروگرام نا رداٹ بجٹ نسخان اٹی کمتی کن گام گیج کننگ ءِ۔ اوپارے کہ کنے یقین ءِ کہ ایلو پدتموک ملک آتے ننے آنبار نا حالیت مون تروک ءِ کہ ہراوڑ زرگزران ءِ سوگو کیرو ایلو کنڈآ بجٹ نسخان اٹی ہم کمتی اتنگے۔ اوپارے کہ ودکی سرمایہ اسکان رسینگ مالیاتی انتظام و شرح نمو نا بحالی نا کسر ءِ ۔ اوپارے کہ اپریل اٹی او وام تیٹی ریلیف نا بابت جہانی گام گیج نا خواست کریسس، مئی ٹی جی ٹوینٹی ملک آتا کنڈآن وام معطل کننگ و اوکان پد بروک آ سال جون اسکان اوٹی ودکی کننگ اوفتا منت وار اُن۔ داکان بیدس نن آئی ایم ایف و ورلڈ بینک انا کنڈآن وام تا ترندی اٹ فراوانی نا آسراتی کن ہم گام گیج آتا ستاءِ کینہ۔ اوپارے کہ داتم اسکان اخس کہ زر یکجا مسنے او کورونا دین انا اثرآتیان پیش تمنگ کن او پدتموک ملک آتا گرج آتے پورو کننگ کن بس افس۔ و پنچ پدتموک ملک تینا وام تا بابت مہالو آن خواتہ مسنو و ایلو ملک آک ہم اوفتیانبار خواتہ مننگ کیرہ۔ کیہی ملک آتے بھلو کچ اسے آ وام تا واپسی و کٹیا تیٹی کمتی نا ویل مون تروک ءِ۔و او ہم زرگزرانی بھسکاری نا دنگ آٹی ءُ۔ اوپارے کہ دنیا نا گڑاس علاقہ غاتیٹی ممکنہ افلاس نا بابت جہانی ادارہ خور انا رپورٹ گڑتی ءُ۔ او پارے کہ اقوام متحدہ نا سیکرٹری جنرل و کینیڈا و جمیکا نا وزیر اعظم آک شونداری کن مالی کمکاری نا بابت امداد نا معاملہ ءِ ہرفیر۔ داٹی پدتموک ملک آتا مالی کمکاری کن سد آ پشن تا پیدواری ءِ کننگانے۔ نن اومیت کینہ کہ دا عمل ءِ گڑاس پبی گام گیج آتا کمک اٹ زوت ایسر اسکان سرکننگک۔ وزیراعظم پارے کہ جہانی مالیاتی نظام اٹ اصلاحات، وام تا انتظام نا جامع و بریبر وڑوڈول اس جوڑ کننگ، اسہ جمہوری ایس ڈی جی ٹریڈنگ سسٹم اسے نا جوڑ کننگ و خراج نا ساف جہانی نظام اس جوڑ کننگ نا گرج ءِ۔ اوپارے کہ اگہ کورونا دین انا سوب آن کیہی پدتموک ملک آتیٹی اقتصادی بھسکاری ءِ توروئی ءِ تو داڑکن جہانی برادری ءِ گڑاس اولیتی گام گیج آتا پیدواری ءِ کننگ و اوفتیا عملدرآمد کروئی مریک۔ اودمدستی گام گیج کن دہ ٹکی ایجنڈا پیش کرسا پارے کہ دین انا چٹفنگ اسکان پدتموک ملک آتا وام تے موخر کننگے۔ بے کچ پسماندہ ملک آتا وام تے معاف کننگے، جامع کثیر طرفہ فریم ورک انا رداٹ پدتموک ملک آتا وام تا ری سٹرکچرنگ ءِ کننگے، پنچ سد ارب ڈالر نا خصوصی فنڈ جتا کننگے۔ ملٹی لیٹرل ڈویلپمنٹ بینک آتا کمک اٹ کم شون ہلوک ملک آتیکن رعایتی وام تا آسراتی تننگے، کم شرح آ گونڈ مدتی وام فراوان کننگے۔ کم شرح آ گونڈ ءُ وخت اسے نا وام تا فراوانی کن پوسکن لیکویڈیٹی و سسٹین ایبلٹی فیلسٹی ودی کننگے۔ شونداری ٹی 0.7 درسد نا کمکاری نا بابت وعدہ پورو کننگے۔ پائیدار بنداوی پنجر کن سالانہ 15 کھرب ڈالر نا زرکاری نا بست وبند کننگے، پدتموک ملک آتیٹی موسمیاتی بدلی کن سالانہ سد ارب ڈالر نا فراوانی نا ہدف ءِ پک کننگے، پدتموک ملک آتیان ہزگار ملک آک، خراج نا بابت محفوظ آف شور ہند آتیا غیرکانودی وڑاٹ زرانا گدریفنگ ءِ توننگ کن دمدستی گام گیج مرے۔ وڈی خور سیاست دان و ڈوہدار تا کنڈآن پلوک آ میرات آتون تعلقدار ملک آتیٹی دمدستی واپسی ءِ پک کننگے۔ اوپارے کہ او باور کرفک کہ دا اسہ گام گیج آن ایلو بھاز انگا گام گیج آتا مقابلہ ٹی پدتموک ملک آتے زیات فائدہ مریک۔ اوپارے کہ کورونا تنکی آن پیشن پیش تمنگ کن اجتماعی کوشست آتا گرج ءِ و داڑتون اوار اوار پائیدار شونداری نا ہدف آتا دوئی کننگ و پیرس معاہدہ نا رداٹ متعین کروک ہدف آتا دوئی کننگ کن کوشست آتا گرج ءِ۔ اجتماعی زرگزرانی سیکورٹی و جھیڑہ غاتا چٹفنگ کن اقوام متحدہ نا چارٹر آ عملدرآمد ءِ پک کننگے و داچارٹر نا اصول آتا رداٹ نن سوگو و پائیدار اقتصادی، راجی و سیاسی نظام کن اواری اٹ کاریم کین۔
