لاہور۔ 03 دسمبر (اے پی پی) وزیراعلیٰ پنجاب سردار عثمان بزدار تون پنچ شنبے نادے آ وزیر مملکت ماحولیاتی بدلی زرتاج گل اوڑدہی کرے۔ اوڑدہی ٹی عمومی حالیت، کلین اینڈ گرین پاکستان پروگرام و سیاسی باندات آ گپ وتران کننگا۔ وزیراعلیٰ عثمان بزدار داوخت آ گپ وتران کرسا پارے کہ وزیراعظم عمران خان نا کماشی ٹی پاکستان اٹی ماحولیاتی کچٹی نا مون ءِ توننگ کن سنجیدہ گام گیج کرینے، کلین اینڈ گرین پاکستان پی ٹی آئی نا فلیگ شپ پروگرام ءِ، پوسکن آ چین ءِ کچٹی آن پاک چاگڑد اس ایتنہ و پی ڈی ایم ہرا سیاسی کچٹی تالان کرینے، اوفتے ہم ساف کینہ۔ اوپارے کہ اپوزیشن نا ٹولہ ملک اٹی سیاسی کثافت نا زموار ءِ، الس کرپشن آن کچٹ زموار آتا جھانسہ ٹی بفک، مخالف آتا منفی بیانیہ بھاز بے وڑ ترخانے، الس اٹ پی ڈی ایم ءِ بیرہ رسوائی ملنگ ءِ و ملسا کیک۔ وزیر مملکت ماحولیاتی بدلی زرتاج گل پارے کہ وزیراعظم عمران خان نا ویژن نا رداٹ وزیراعلیٰ عثمان بزدار پنجاب ءِ شونداری نا کنڈآ درینے، وزیراعلیٰ عثمان بزدار سویلی پنجاب ءِ پوسکن ءُ شناخت اس تسنے۔ اوپارے کہ اپوزیشن جماعت آک جند انا فائدہ غاتا ایجنڈاآ چلینگ انگ ءِ، دا ٹولہ اول ملک ءِ پُلا و داسہ کورونا ٹی الس نا زند آتون گوازی کننگ ءِ۔
