اسلام آباد۔ 03 دسمبر (اے پی پی) وزیراعظم عمران خان نا کماشی ٹی پاکستان آئیلینڈ ڈویلپمنٹ اتھارٹی و راوی اربن ڈویلپمنٹ اتھارٹی نا بابت پنچ شنبے نادے آ دیوان اس اڈ ہلک ہراٹی بنجائی وزیر حوالکاری و شینکاری سینیٹر شبلی فراز، بنجائی وزیر بحری امور سید علی حیدر زیدی، خصوصی کمکار ڈاکٹر شہباز گل و سید ذوالفقار عباس بخاری، گورنر سندھ عمران اسماعیل، چیئرمین نیا پاکستان ہاؤسنگ اتھارٹی، چیئرمین راوی اربن ڈویلپمنٹ اتھارٹی و چیئرمین پاکستان آئیلینڈ ڈویلپمنٹ اتھارٹی آن بیدس بڑزکو حکومتی کمامدارآک ساڑی ئسر۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم عمران خان پارے کہ ہاؤسنگ سیکٹر اٹ ودوک آ ڈیمانڈ نا رداٹ دا ہڑتوم آ ڈٹ آک بھاز اہمیت تخرہ۔ وزیراعظم پارت کرے کہ دا ڈٹ آتا مثبت پلوآتے تالان کننگ نا گرج ءِ۔ اوپارے کہ آگاہی مہم نا کمک اٹ الس نا علم اٹ اتنگے کہ دا پروجیکٹ آتا کمک اٹ ننا کیہی زرگزرانی و ماحولیاتی ویل آتا ایسر ممکن مریک۔ مخلوق ءِ نوکری و روزگار نا وارخواہی دُوبریک و ماحولیاتی کچٹی ٹی کمتی واقع مریک۔ وزیراعظم مستی پارے کہ ننے پیشن نا ملک رہینگوک آ پاکستانی تا ہم دا ڈٹ آتیٹی پبی بشخ ہلنگ ءِ پک کروئی مریک۔ وزیراعظم پارت کرے کہ داہڑتوم آ ڈٹ آتا چندی ریسہ غاتے وخت آ پورو کننگ کن مد آتا تعین ءِ کننگے و دافتیا عملدرآمد ءِ پک کننگے۔ دیوان ءِ ہڑتوم آ ڈٹ آتیا داتم اسکان مروک آ پیش رفت نا بابت معلومدار کننگا۔ دیوان ءِ پاننگاکہ ایف ڈبلیو او و این ایل سی راوی اربن ڈویلپمنٹ اتھارٹی ٹی کاریم نا بناءِ کرینن و ڈٹ انا چندی ریسہ غاتے پورو کننگ کن مد آتا پیدوار تعین ءِ کننگانے۔ دیوان ءِ چائینیز کمپنی تتون مروک آ شریداری عمل نا بارواٹی ہم معلومدار کننگا۔
