اسلام آباد۔ 3 دسمبر (اے پی پی) بلوچستان عوامی پارٹی ءِ سینئر باسک ءُ نامداریں شخصیت حاجی احمد آسکانی ءَ وتی جاری کتگیں بیان ءَ گشتگ کہ بلوچستان حکومت ءِ کارءُ کردءِ سرءَ کس شک کُت ناکنت چیا کہ اے حکومت ءِ کارء ُ کرد چو آدینک ءَ ساپ اَنت۔ ایشی ءَ ابید آئی ءَ گشتگ کہ میر حاجی اکبر آسکانی ءِ وڑیں ناتُرس ایمان دارءُ گریب دوستیں راہشون پہ حلقہ پی بی 48/4 کیچ تمپ ءُ ناصر آباد ءِ مردمانی وش بھتی اِنت۔ آئی ءَ گشتگ کہ صوبائی اسمبلی ءِ باسک ءُ صلہ کار فشریز میر حاجی اکبر آسکانی ءَ کم وہد ءَ پہ بلوچستان ءِ اُلس ءُ وتی حلقہ ءِ مردمانی باز ازمت کتگ ، آئی ءَ گشت کہ گوستگیں بجٹ ءَ وانگ جاہ جوڑ کنگ ءُ شلیٹر لیس وانگ جاہ آں بلڈنگ دیئگ ، لائبریری ، اسپورٹس اسٹیڈیم ، فٹبال اسٹیڈیم ءُ گرلز اسکول آنی اپ گریڈیشن ٹو ہائرسیکنڈری ءِ تہ ءَ ناصر آباد گرلز ہائر سکینڈری خیرآباد ہائرسیکنڈری تمپ گرلز ہائرسکینڈری وانگ جاہ ہوار اَنت۔ آئی ءَ گشتگ کہ میرحاجی اکبر آسکانی ہمک سال ءَ وتی دمگ ءِ تجاویزات ، سفارشات ءُ ایندگہ کارانی ھاترءَ آسکانی گس کیچ ءَ سے ماہی دیوان کنت ءُ وتی پارٹی مردم ووٹر ءُ کمک کاراں دعوت دنت ءُ آیانی جیڑہ ءُ جنجالاں گوشداریت ءُ آیاں گیشءُ گیوار کنت۔ میرحاجی اکبر آسکانی ءَ وتی حلقہ ءَ دیمروئی ءِ نوکیں در پچ کتگ اَنت، پبلک لائبریزی ءُ لیب ءُ گوازی ءِ پڑ جوڑ کتگ، پبلک ٹرانسپورٹ ءِ ھاترءَ بازیں دمگاں لنک روڈ زبیدہ جلال روڈ تاں تمپ واڑن لنک روڈ زبیدہ جلال روڈ تا بالیچہ لنک روڈ ، زبیدہ جلال روڈ خیبرآباد لنک روڈ ، زبیدہ جلال روڈ تا ں ناصر آباد ہوار اَنت۔ ایشاں آبید ہورءُ ہارءَ چہ رکگ ءِ ھاترءَ رکینگی بند جوڑ کنگ بوتگ اَنت ۔ ایشی ءَ ابید آئی ءَ بازیں واٹر سپلائی اسکیم ہم داتگ اَنت کہ ایشانی تہ ءَ دازن تمپ کوشقلات ، ملک آباد ،پھل آباد، کلاہو، بالیچہ ، میرآباد لہلین ، بلوچ آباد ءُ بازیں واڈاں واٹرسپلائی اسکیم داتگ۔ ایشی ءَ ابید پہ جان ءُ سلامتی ءِ پڑءَ آئی ءِ بازیں ازمت اَست اَنت ۔ 3 بیسک ہیلتھ یونٹ ہم منظور کنائینتگ اَنت کہ ایشانی تہ ءَ بی ایچ یو پھل آباد ،بی ایچ یو تگران آباد ءُ بی ایچ یو شے کہن ہوار اَنت۔ ایشی ء َ ابید تمپ ڈویلپمنٹ ءِ ماسٹرپلان ءِ منظوری یک سوگاتے کہ ایشی ءِ تہ ءَ نیزگاریں ءُ ہنر مندیں مردمانی ھاترءَ روزگار ءِ موہ ودی بنت۔ آئی ءَ گشتگ کہ انشااللہ تمپ ءِ فزیبلیٹی رپورٹ ہم زوت بلوچستان ءِ سر وزیر جام کمال عالیانی ءَ را زوت پیش کنگ بیت کہ پہ تمپ ءِ اُلس ءِھاترءَ یک مزنیں سوگاتءُ وشیں حالے بیت۔
