اسلام آباد۔ 03 دسمبر (اے پی پی) پارلیمنٹ ہاؤس اٹی خصوصی بندغ آتا جہانی دے انا وخت آ اڈ ہلوک آ دود انا بشخ ہلوک آک دا عزم انا درشانی ءِ کرینو کہ خصوصی بندغ آتے راج انا فعال شاری جوڑ کننگ و اوفتا کسر اٹی بروک آ مشکل آتا ازالہ ءِ کننگ کن حکومت و نجی بشخ اواری اٹ مون آ کارہ۔ پنچ شنبے نادے آ پاکستان تون اوار مچ آ دنیا ٹی اڈ تروک آ خصوصی بندغ آتا جہانی دے انا چرجوئی ٹی دود اسپیکر قومی اسمبلی اسد قیصر نا کماشی ٹی اڈ ہلک ہراٹی بنجائی وزیر محمد اعظم خان سواتی، وزیراعظم نا سلاہکار بابر اعوان، باسک اسمبلی منزہ حسن، احمد حسین و ایلوفک بشخ ہلکر۔ داکان بیدس خصوصی بندغ آتیکن خذمت سرتروک آ ادارہ و خصوصی بندغ آک بشخ ہلکر۔ باسک قومی اسمبلی منزہ حسن پارے کہ اسپیکر نا کماشی ٹی خصوصی بندغ آتا راجی آسراتی کن کانود سازی کننگک۔ غیر سرکاری تنظیم اسٹیپ نا ایگزیکٹو ڈائریکٹر عاطف شیخ پارے کہ حکومت و غیر سرکاری ادارہ غاک تینا پبی کڑد ءِ ادا کننگ ءُ ولے داسکان بھاز گڑا کننگ نا گرج ءِ۔ دود ءِ پاننگاکہ جہانی بینک انارپورٹ نا رداٹ دنیا ٹی 15 درسد بندغ معذوری نا زند ءِ تیر کننگ ءُ۔ اسہ غیر سرکاری تنظیم اسے نا ڈائریکٹر ابیہہ اکرم پارے کہ پاکستان دنیا نا اسٹ انگا ملک ءِ ہراڑے خصوصی بندغ آتیکن دود پارلینٹ نا کہول آ اڈتننگ انگ ءِ۔ داوخت آ اسپیکر خصوصی بندغ آتے خدیجہ الکبری ایوارڈ تس۔ دود اٹی خصوصی بندغ و چناتا پرفارمنس ہُننگ نا قابل ئس۔ خصوصی بندغ آک نعت و قوالی ہم پیش کریر۔ دود اٹی اسپیکر قومی اسمبلی اسد قیصر نا خصوصی بندغ آتے آسراتی تا فراوانی کن کروک آ کوشست آتیا جوڑ کروک آ دستاویزی فلم ہم چلینگا۔ دود اٹی اسپیکر قومی اسمبلی نا مسڑ ظل قیصر ہم بشخ ہلک۔ ظل قیصر ہم خصوصی بندغ آتیٹی اوار ءِ۔
