کوئٹہ۔ 03 دسمبر (اے پی پی) ڈپٹی اسپیکر قومی اسمبلی قاسم سوری گیس پریشر نا کمتی نا ویل ءِ ایسر کننگ کن کوئٹہ، مستونگ و قلات کن اسہ ارب روپئی نا خڑچ آن پوسکن شاغوک آ گیس پیپ لین نا بناءِ کرے۔ پنچ شنبے نادے آ کوئٹہ نا علاقہ سریاب روڈ آ مروک آ بنائی دود اٹی جنرل منیجر سوئی سدرن گیس کمپنی مدینی صدیقی، پاکستان تحریک انصاف نا صوبائی جنرل سیکرٹری عبدالباری بڑیچ، مرکزی ڈپٹی سیکرٹری حوالکاری داؤد خان پانیزئی، زکواۃ چیئرمین ڈسٹرکٹ کوئٹہ سردار زین العابدین خلجی،م سید ظہور آغا و ایلوفک ہم ساڑی ئسر۔ داوخت آ صحافی تتون گپ وتران کرسا ڈپٹی اسپیکر قاسم سوری پارے کہ سیڷ اٹی گیس پریشر اٹی کمتی نا متکن آ ویل ئس، سریاب روڈ آ 40 سال 6 انچ نا پیپ لین ئس ہرا علاقہ کن بس الوکہ، شار انا چندی علاقہ غاتا ہڑتوم آ کنڈآتیا 8 انچ انا پوسکن ءُ پیپ لین شاغنگ انگ ءِ، گیس پیپ لین نا ڈٹ آ 1 ارب روپئی خڑچ بریک اوکان پد کوئٹہ ٹی گیس انا ویل ایسر مریک و پوسکن آ گیس پیپ لین نا عمل ستمبر 2021ء اسکان پورو کننگک، اوپارے کہ ننا کوشست ءِ کہ بلوچستان نیشنل پارٹی دُوارہ حکومتی سیوت نا بشخ مننگ کے۔ پاکستان تحریک انصاف نا حکومت بے گواہ بندغ آتے بازیاب کرفینے بطور ڈپٹی اسپیکر قومی اسمبلی حلقہ گچین کاری آن ایڑتر مرسا اسلام آباد اٹی مچ آ صوبہ نا مخلوق نا نمائندگی ءِ کننگ اُٹ، 47 سال آن پد وزیراعظم عمران خان تربت نا دورہ ءِ کرسا سویلی بلوچستان نا نہہ ضلع غاتیکن 6 سد ارب روپئی نا پیکج تس کورونا دین انا ارٹ میکو ریسہ نا رداٹ پاکستان تحریک انصاف تینا جلسہ و بھلا مچی تے منسوخ کرینے دُن تو جلسہ جلوس کننگ ہرسیاسی جماعت نا جمہوری حق ءِ ولے اپوزیشن جماعت آک الس ءِ کورونا دین آن بچفنگ کن تینا جلسہ غاتے منسوخ کیر، کوئٹہ شار اٹی دیر انا کمتی ءِ مُر کننگ کن کیہی ڈیمک تفنگ انگ ءُ وخت اس کہ چندی علاقہ غاتیٹی سولر ٹیوب ویل خلنگانے الس دیر انا کاریم اٹ اتنگ اٹ احتیاط کیر، سرکاری ڈغار تے کوزہ مافیا غان واگزار کرفنگ انتظامیہ نا زمواری ءِ، بنجائی وزیر ڈٹ بندی و شونداری اسد عمر تون اوار زوت قطبی بلوچستان نا چندی ضلع غاتا دورہ ءِ کرسا سلاہ ئی شونداری پیکج نا خدوخال ءِ وزیراعظم عمران خان ءِ پیش کینہ، بلوچستان نیمہ پاکستان ءِ ولے آبادی بیرہ 6 درسد ءِ کوئٹہ تون اوار مچ آ صوبہ ٹی پشتون بلوچ ہزارہ، سندھی، سرائیکی، سیٹلرز و پنجابی تون اوار غٹ قوم تا مخلوق مہرومریبت اٹ زند ءِ تیر کننگ ءُ و حکومت رنگ و نسل و زبان نا پرخ ءِ اسہ کنڈ تخسا الس نا خذمت آ یخین تخک، بلوچستان اسٹ ءِ، سویلی بلوچستان نا اصطلاح شونداری کاریم تا رفتار ءِ ترند کننگ و مستین اٹ شونداری آن محروم تخوک آ علاقہ غاتیکن کاریم اٹ اتنگا، ہراٹی ہچ ءُ ہیب اس اف۔ اوپارے کہ اسحاق ڈار عدالت آتے درکار ءِ بدبختی اٹ گڑاس سیاست دان بیرہ پیسہ جوڑ کننگ و حکومت کننگ کن پاکستان آ بریرہ و اوفتا چناک پیشن نا ملک آتیٹی رہینگرہ و اقتدار آن محرومی آن پد اوہم پیشن نا ملک اٹی رہینگ انگ ءِ اولیت ایترہ ہراکہ ملک اتون خیانت آنبار ءِ، ڈپٹی اسپیکر قومی اسمبلی پارے کہ نیب آجو و وتواجہ ادارہ اسے ہراحکمران جماعت تون اوار ہرپارٹی نا پارلیمنٹ نا باسک آتا برخلاف کیس دائر کننگ کیک، وزیراعلیٰ بلوچستان جام کمال نا کماشی آ پاکستان تحریک انصاف نا پورو پت ءِ و بلوچستان اٹی پاکستان تحریک انصاف و بلوچستان عوامی پارٹی نا نیام اٹ السی ویل آتیکن گچین ریلیشن شپ جوڑ ءِ۔ اوپارے کہ گیس دُزی کروک آتا برخلاف جرمانہ عائد کننگ تون سزاہم سلاہ کننگانے الس گیس انا دُزی ءِ توننگ کن سوئی گیس انتظامیہ تون کمک کیر۔ اومستی پارے کہ گیس اتون دیر و شار انا ایلو ویل آتا ایسری آہم گام گیج برجاءِ، نیب اسہ آجوادارہ اسے ہرا بے پرخ کرپٹ زموار آتا برخلاف کارروائی کننگ ءِ، بی این پی نا سردار اخترمینگل تون مذاکرات جاری ءِ، است خواہی ءِ کہ بی این پی دُوارہ سیوت اٹ اوار مرے، کورونا دین انا تالانی خطرناک حالیت اس اختیار کرے، غٹ سیاسی جماعت آتیان خواست ءِ کہ کورونا نا ایس او پی تا پاسداری ءِ کیر۔
