اسلام آباد۔ 03 دسمبر (اے پی پی) صدر مملکت ڈاکٹر عارف علوی پارینے کہ اینو 4 دسمبر آ یوم دعا اڈتننگک، جمعہ نا نماز نا مچی تیٹی کورونا دین انا ارٹ میکو ریسہ غان رکھ اکن خصوصی دعا کننگک، کورونا دین انا ارٹ میکو ریسہ غا عالم دینک گڑتی نا درشانی ءِ کرینو، دین آن رکھ اکن الس نا آگاہی آ عالم دینک امنا کرینو، مسیت آتیٹی ایس او پی تیا عملدرآمد ءِ پک کننگک، الس نا آگاہی کن میڈیا ہم تینا کڑد ءِ ادا کے، عالم دینک خواست کرینو کہ منہ وخت اکن جلسہ جلوس آتے موخر کننگے۔ عالم دینک امنائی وڑاٹ 17 اپریل نا ایس او پی تیا عملدرآمد نا درشانی ءِ کرینو۔ پنچ شنبے نادے آ داڑے کورونا دین انا ارٹ میکو ریسہ و اونا حالیت آتا بارواٹ بنجائی وزیر مذہبی امور و بین المذاہب ہم آہنگی نورالحق قادری و وزیراعظم نا خصوصی کمکار جان جوڑی ڈاکٹر فیصل سلطان تون اوار بریفنگ اٹی گپ وتران کرسا صدر مملکت ڈاکٹر عارف علوی پارے کہ کورونا دین انا اولیکو ریسہ ٹی اپریل اٹی اوسط 500 ناجوڑ ئسر۔ الس نا رکھی گام گیج آتیٹی دین انا تالانی نا مون ءِ توننگا و 22 جون آ 6400 ناجوڑ آتا ٹیسٹ مثبت بس ہرا 6500 اسکان ودنگ آن پد سلیس۔ اوپارے کہ داسہ کورونا نا ارٹ میکو جلہو ءِ دانا رداٹ الس آن خواست ءِ کہ اولیکو ریسہ ٹی دوئی سرسہبی تے مون آ تخسا رکھی گام گیج کیر و دا مہم اٹی کورونا دین اتون جنگ تروک آ لوز آتا جاگہ غا کورونا نا دین آن بچنگ ءِ اوار کننگے۔ صدر مملکت پارے کہ دین آن رکھ اکن اللہ تعالیٰ تون رجوع کننگے و دا بابت اینو جمعہ نا مچی تیٹی خصوصی دعا تتون اوار اوار مچ آ ملک اٹی یوم دعا اڈتننگک۔ اوپارے کہ عالم دینک ارٹ میکو ریسہ غا گڑتی نا درشانی ءِ کرینو و امنائی وڑاٹ پارینو کہ مسیت آتیٹی ایس او پی تیا عملدرآمد ءِ پک کننگک۔ الس نا آگاہی نا گرج ءِ۔ دا بابت میڈیا ہم مست آنبار کڑد ادا کے وخت اس کہ عالم دینک ملک انا سیاسی سرکڑدہ غاتیان خواست کرینو کہ جلسہ و جلوس آتے منہ وخت اکن موخر کننگے۔ اوپارے کہ اولیکو ریسہ و مننبر و محرام آن بروک آتوار آ الس عمل کرے۔ اوپارے کہ عالم آک منظم ءُ و اوفتا ہیت ءِ خف توننگک۔ صدر پارے کہ کورونا غان بیدس جان جوڑی نا ایلو ویل آتیٹی ہم عالم آتیان کمک ہلنگے۔ اوپارے کہ ناموس رسالت و او آئی سی اعلامیہ ٹی وزیراعظم عمران خان اہم کڑد ادا کرے ہرانا غٹ عالم دینک امنائی وڑاٹ ستاءِ کریر۔
