اسلام آباد۔2دسمبر (اے پی پی): حال ء ُ اھیوال کاری ءُ شنگکاری ءِ بنجاہی وزیر سینیٹر شبلی فراز ءَ گوں چین ءِ سفیر نونگ رونگ ءَ چارشمبے ءِ روچءَ گندءُ نند کتگ ۔ گندءُ نندءَ میڈیا ءُ دودءُ ربیدگ ءِ پڑآں پاکستان ءُ چین ءِ نیام ءَ دونیمگی کمک ءَراگیش کنگ ءِ ضلورتءِ سرءَ زورپِر داتگ۔ بنجاہی وزیر ءَ دودءُ ربیدگی نزیکی ءَ راگیش کنگ ءِ سرءَ زور پِر داتگ ءُ گشتگ کہ تامور “پرواز ہے جنون” ءِبندات نومبر ءَ بوتگ کہ اے چین ءِ چاروک ءُ تامور ءِ پڑءَ گوں سیادی داروکیں پروفیشنل آں ساڑاتگ۔ “ما تامورانی پڑءَ کمک ءَرامحکم کنگ لوٹا ں چیا کہ یک چاگردے ءِ بنکی شرپ ءُ بستار ءُ دود ءُ ربیدگی میراث ءِ گیش کنگءِ ھاترءَ حاس بیت”۔بنجاہی وزیر ءَ فلم پروڈیوسرز ایسوسی ایشن آف پاکستان ءِ چینی سفیر ءَ گون گندءُنند کنگ ءِ واہشت ءَ چہ سرپد کتگ تنکہ اے پڑءَ کمک ءِ سرءَ ھیال ءُ لیکہ ءِ درشانی کنگ بہ بیت۔ بنجاہی وزیر ءَگشتگ کہ چین پاکستان اقتصادی راہداری ( سی پیک) ءِ یک حاسیں منصوبہ اِت ایشی ءَ چہ دمگی نزیکی گیش بنت۔ چینی سفیر نونگ رونگ ءَ گشتگ کہ چین دوئیں ملک آنی نیام ءَ میڈیا سیادی ءَ ر گیش کنگءِ ھاترءَ کمک کنت، چین کویڈ 19 ءَ را کم کنگ ءَ پد پاکستانی میڈیا ڈل ءَ را چین ءِبازیں شہرآنی ترءُ تاب ءِ ارادگءَ کنگ ءَ اِنت۔ چینی سفیر ءَ دوئیں ملک آنی میڈیا ءِ نیام ءَ نزیکی ءَ را گیش کنگ ءِ سرءَ زور پِر داتگ تانکہ سی پیک منصوبہ ءِ ہوالگءَ ردی ھیال ءُ لیکہ ہلاس کنگ بہ بیت۔ حال ءُ اھیوال کاری ءُ شنگکاری ءِ بنجاہی وزیرءَ چین ءِ حال ءُ اھیوال کاری ءُ شنگکاری ءِ وزیر ءَ را پاکستان ءِ ترءُ تاب کنگءِ دعوت داتگ تانکہ آ میڈیا ءُ حال ءُ اھیوال کاری ءِ پڑاں کمک کنگ ءِ موہ درگیجگ بہ بنت۔ دوئیں باسکاں استیں کمک ءَر ا گیش محکم کنگ ءِ ھاترءَ نزیکی ءَ را گیش کنگءِ ضلورت ءِ سرءَ زور پِر داتگ۔ اے دیوان ءَ حال ءُ اھیوال کاری ءُ شنکگاری ءِ مزنیں حکام ہم ہوار بوتگ اَنت ۔
