گلگت۔ 02 دسمبر (اے پی پی) وزیراعظم عمران خان پارینے کہ پی ڈی ایم نا راہشون تینا دُزی ءِ بچفنگ کن جلسہ کننگ ءُ، دا دُزی نا پیسہ غاتے بچفنگ کن وخت اس زندان تیا کارہ ووخت اس پیشن نا ملک آتیا نریرہ۔، اوفتا اولیاد آتے ہم دروغ انا زی آ دروغ تڑوئی تمنگ ءِ۔ السی نمائندہ غاک پیسہ کٹیا کننگ نا جاگہ غا الس نا خذمت ءِ تینا شعار کیر و گلگت بلتستان نا الس نا زندءِ بدل کننگ کن تینا کوشست و لائخی تے کاریم اٹ اتیر و گورننس نا بڑزکو آب ءِ قائم کیر۔ جان جوڑی کارڈ و احساس پروگرام نا دنگ ءِ گلگت بلتستان اسکان ودفنگک، سیل و سوات نا مون آ دننگ کن اڑزآن وام تننگک، ہائیڈرو الیکٹرک تون خصوصی اقتصادی زون جوڑ کینہ۔ داخیال آتا درشانی ءِ او چارشنبےنادے آ گلگت بلتستان نا پوسکن گچین مروک آ کابینہ نا سوغندی دود آن تران کرسا کرے۔ وزیر اعظم عمران خان گلگت بلتستان نا کابینہ و وزیراعلیٰ ءِ اوفتا گچین کاری آ مبارکبادی تس و دااومیت نا درشانی ءِ کرے کہ گلگت بلتستان اٹ ہندن ءُ حکومت اس مریک ہرا اسہ آب اس جوڑ کیک و اسہ پوسکن ءُ روایت اس شاغک و گورننس ناہندن ءُ گچین ءُ نظام اس جوڑ کیک ہراڑآن گلگت بلتستان نا الس نا زند بدل مریک۔ اوپارے کہ ای گلگت بلتستان نا علاقہ ءِ خنانٹ و داڑآن بلد اُٹ۔ ہمووخت آن دانگ بننگ اُٹ ہراتم قراقرم وے ہم الوکہ۔ ای دا علاقہ نا ویل و داٹی ساڑی پوٹیشنل آن معلومدار اُٹ۔ ننا حکومت گلگت بلتستان ءِ ہندن ءُ کنڈ اسے آ دیک ہراڑآن الس نا زند بدل مریک۔ اوپارے کہ گلگت نا الس نا احساس محرومی تے مُر کننگ کن صوبائی سٹیٹس ایتنہ انتئے کہ داجاگہ نا ورناک و الس اٹ احساس ئس کہ او بریبر نا شاری افس ہنداخاطرآن نن پوسکن ءُ سیٹ اپ اس جوڑ کرین۔ داڑکن اسہ کمیٹی اس ٹہیہفنگے ہرا صوبہ نا حیثیت نا بابت کاریم کیک۔ اوپارے کہ سرسہب سسٹم ہمو مریک ہراٹی الس تینا فیصلہ غاتے تینٹ کننگ نا اختیار تخے و تینکن تینٹ ڈٹ جوڑ کے۔ وزیراعظم پارے کہ نن ریاست مدینہ نا ہیت ءِ کینہ ہراٹی نزور تپہ ءِ بڑزآ ہرفنگ ریاست نا اولیت مریک۔ دامسخت کن نن پاکستان نا تاریخ اٹی نیزگاری نا چٹفنگ نا غٹ آن بھلا احساس پروگرام نا بناءِ کرین۔ گلگت بلتستان نا الس کن انصاف جان جوڑی کارڈ درستی راستی کرفنگ اُن۔ جان جوڑی کارڈ آن 10 لکھ اسکان مفت درمان کرفنگ نا آسراتی میسر مریک انتئے کہ ناجوڑی نا حالیت اٹ نیزگار اُراک وامدار مریرہ و درمان کرفنگ نا وس تخپسہ۔ جان جوڑی کارڈ انا بناءِ کننگ آن پد گلگت بلتستان نا شاریک ہم ہرہسپتال آن مفت درمان کرفنگ کیرہ۔ وزیراعظم عمران خان پارے کہ گلگت بلتستان اٹی سیل و سوات نا گچین وارخواہی ساڑی ءِ۔ کورونا نا سوب آن تدوک آ باسنی تیٹی سیل و سوات نا بشخ زہمی مسنے۔ سیل و سوات نا مون آ دننگ کن اڑزآن وام تننگک و مخلوق تینا اُراتتون گیسٹ روم جوڑ کننگ کیرہ۔ داڑآن سیل و سوات ءِ ہم مون آ دننگک کٹیا نا ذریعہ ہم دُوبریک۔ وزیراعظم پارے کہ سکیانگ نا مون آ دننگ آن سیل وسوات اٹی ودکی مریک۔ گلگت بلتستان اٹی سکی انگ نا بھاز سکوپ ءِ۔ داڑے سکیانگ کن آسراتی مہیا کینہ ہراڑآن پیشن نا ملک آن ہم سیل و سواتیک یخ آتیٹی ہم دا علاقہ غاتیا بریرہ وزیراعظم پارے کہ سکردو ٹی 250 کٹ انا ہسپتال اس جوڑ کننگ انگ ءِ۔ اودے پین اپ گریڈ کننگک۔ گلگت بلتستان اٹی ہائیڈرو الیکٹرک تون خصوصی اقتصادی زون جوڑ کینہ۔ دیر آن بجلی ودی کننگ نا 6 بھلو اسٹیشن خلینہ۔ داکان بیدس خیبرپختونخواآنبار مائیکرو ہائیڈل اسٹیشن ہم جوڑ کننگک۔ سولر توانائی نا آسراتی ہم ایتنہ تانکہ غٹ علاقہ غاتسکان بجلی سرمننگ کے۔ وزیراعظم پارے کہ تحریک انصاف نا ویژن ءِ کہ شیفکو تپہ ءِ بڑزآ ہرفنگے۔ مدینہ نا ریاست نا اصول آتیا عمل کرسا نیزگار تپہ غاتا زند آتیٹی گچینی اتنگ ننا مشن ءِ۔ کچ اٹنگا وسیلہ غاتیان پد ہم رسول صلی اللہ علیہ و آلہ وسلم غریب آتا دادرسی ءِ کرے انتئے کہ انسانیت نا کمک ءِ کننگ آن اللہ خوش مریک۔ اوپارے کہ لیڈر شپ انا خاصیت آتیٹی صادق و امین مننگ المی ءِ۔ خواجہ نبی کریم صلی اللہ علیہ و آلہ وسلم آن پد قائد اعظم محمد علی ءِ ای تینا لیڈر منیوہ انتئے کہ او ہم صادق و امین ئس۔ قائد اعظم انگریزی ٹی تقریر کریکہ ہرا بندغ آتے سمجھ ہم بتوکہ ولے اوفے باور مسکہ کہ او انت کہ ہیت اس کننگ ءِ او سچاءُ۔ وزیراعظم گلگت بلتستان کابینہ نا باسک آتے تاکید کرے کہ او صادق و امین مریر و الس نا راجی آسراتی کن تینا لائخی و کوشست آتے کاریم اٹ اتیر۔ وزیراعظم پارے کہ مسکوہی حکمرانک نیب انا سروک ءِ ہم تینا پسند آ تخار و مک مکا کریر ولے اوفتا دُزی پانامہ لیکس انا حالیت اٹ مون آ بس ۔ پیسہ غاتے ڈکنگ کن دروغ انا زی آ دروغ تڑوئی تمک۔ حرام نا پیسہ کٹیا کروک و اوفتا اولیاد آتیکن ہم تباہی اس اتیک بریک۔ زرداری و شریف خاہوت ءِ 40 سال آن چاوہ۔ دُزی نا پیسہ غاتے بچفنگ کن دا وخت اس زندان تیا کارہ و وخت اس سعودی عرب و وخت اس لندن آ نریرہ۔ اوفتا چناتے ہم تیناجائیداد و حرام نا پیسہ غاتا سوب آن دروغ انا زی آ دروغ تڑوئی تمنگ ءِ۔ پی ڈی ایم والاک تینا دُزی ءِ بچفنگ کن جلسہ کننگ ءُ و اوفتے زرس ہم پرواہ اف کہ اوفتا جلسہ غاتیان کورونا دین تالان مننگ ءِ و مرک آک ودنگ ءُ۔ اوپارے کہ تدوک آ دے مسکوہی وزیر خزانہ اسحاق ڈار نا اسہ ہارڈٹاک انٹرویو اسے ٹی ذہنی زور انا سوب آن مون ہروک ئس و او مچ آ دنیا نا مون آ دروغ انا زی آ دروغ تڑسا کریکہ۔ وزیراعظم پارے کہ الس نا خذمت ءِ کینہ تو اللہ ہم خوش مریک و الس ہم دعاایتک۔ الس نا خذمت ءِ کننگ آن ہرا خوشی دوئی مریک او پیسہ ٹی ملنگ کپک۔ اوباور کرفے کہ بنجا گلگت بلتستان تون سلوک ءِ و دانا پورو کمک ءِ کیک۔
