اسلام آباد۔ 02 دسمبر (اے پی پی) وزیراعظم عمران خان سول سرونٹس کارکڑد و نظم و ضبط قاعدہ 2020ء نا منظوری ءِ تسنے۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ دا کانود آتا مسخت سول سرونٹس نا کارکڑد ءِ گچین کننگ و محکمانہ احتساب نا نظام ءِ شفاف و گچین کننگ نا ءِ۔ دا قاعدہ غاتا نمان خدوخال درج ذیل ءِ۔ محکمانہ احتساب نا عمل ءِ ترند کننگ نا خاطر مجاز(اتھورائزڈ آفیسر) نا درجہ چٹفنگانے ہنداخاطرآن داسہ بیرہ اتھارٹی و انکوائری آفیسر/کمیٹی مریک۔ داعمل ءِ اِرادرجہ غاتیٹی کننگ آن مجاز اتھارٹی نا منظوری آن بیدس شیفکو کہول آ ہی آفیسر مجاز نا کنڈآن معمولی سزاتننگ نا ویکل ایسر مریک۔ پوسکن آ قاعدہ ٹی ہرریسہ کن ٹائم لائن مقرر کننگانے۔ چارجز(الزامات) نا ورندی(10 آن 14 دے)، انکوائری کمیٹی/آفیسر نا کنڈآن کارروائی ءِ پورو کننگ نا وخت 60 دے متعین کننگانے۔ اتھارٹی نا کنڈآن کیس انا فیصلہ ءِ 30 دے اٹی کننگک۔ انصاف نا خواست آتے پک کننگ و الزام علیہ ءِ شخصی سماعت نا موقع اتھارٹی /سماعت کروک آ آفیسر نا کنڈآن فراوان کننگک۔ پلی بارگین و والنٹری ریٹرن ءِ ہم وڈی خوری(مس کنڈکٹ) نا زمرہ ٹی اوار کننگا۔ و داوڑنا آفیسر آتا برخلاف کارروائی کننگک۔ ریکارڈ نا فراوانی، محکمانہ نمائندہ نا کنڈآن تاخیر، معطلی، ڈیپوٹیشن/رخصت/سکالرشپ آ ہنوک آ آفیسر آتا بابت معاملہ غاتے پیدوار وڑاٹ وضع کننگانے۔ اسٹیبلشمنٹ ڈویژن ءِ دا قاعدہ غاتا بابت ذیلی قاعدہ/وضاحت وضع کننگ نا اختیار تننگانے۔ ہندن ءُ کیس اسے ٹی ہراڑے چندی آفیسر آتیا دوبہ مرے، ہموڑے بیرہ اسہ انکوائری آفیسر اس مقرر کننگک،۔ دا گام گیج نا مسخت شفافیت ءِ پک کننگ و اسہ ہی کیس اٹ چندی انکوائری آفیسر آتا کنڈآن چندی فیصلہ غاتا غاو ءِ مُر کننگ ناءِ۔ پاکستان ایڈمنسٹریٹیو سروس و پولیس نا آفیسر آک ہرا صوبہ غاتیٹی تینات مریرہ اوفتا بابت چیف سیکرٹری صاحب آتے اِراتُو اٹی فیکٹ فائنڈنگ رپورٹ پیش کروئی مریک ایلو دروشم اٹ اسٹیبلشمنٹ ڈویژن تینٹ کارروائی کیک۔
