اسلام آباد۔ 02 دسمبر (اے پی پی) پاکستان تحریک انصاف نا سینیٹر فیصل جاوید مسلم لیگ (ن) نا راہشون و مسکوہی وزیر خزانہ اسحاق ڈار آ تنقید کرسا پارے کہ او درملکی نیوز چینل ءِ انٹرویوٹی تینا دروغ آن تینٹ تینے بے نقاب کرینے۔ چارشنبے نادے آ نجی ٹی وی چینل اتون گپ وتران کرسا اواسحاق ڈار نا انٹرویو آ تنقید کرسا اوپارے کہ پاکستان مسلم لیگ (ن) وار وار آ تینا دروغ انا بیان تا سوب آن تینا شرف ءِ گوہانے۔ اوپارے کہ ن لیگ نا سرکڑدہ تینا وڈی خوری ءِ ڈکنگ کن دروغ انا سیبو ءِ ہلسا ایلوفتے ریفنگ نا کوشست کننگ ءِ۔ اوپارے کہ شریف خاہوت الس نا فائدہ غاتا خذمت نا جاگہ غا پیشن نا ملک تینا کاروبار ءِ مون آ درے۔ فیصل جاوید پارے کہ مسلم لیگ (ن) نا بڑزکو سرکڑدہ پیشن نا ملک اٹی رہینگ انگ ءِ و حکومت ءِ بلیک میل کننگ کن نام نہاد جلسہ کننگ کن ایلو درجہ نا سرکڑدہ ءِ پدی ہلنگانے و اپوزیشن جماعت آک السی جلسہ غاتا کمک اٹ پاکستان تحریک انصاف نا حکومت آ زور شاغنگ نا کوشست کننگ ءُ۔ اوپارے کہ حزب اختلاف وڈی خوری و منی لانڈرنگ نا معاملہ غاتیان بچنگ کن قومی مفاہمت آرڈیننس (این آر او) دوئی کننگ کن غٹ چم آتے کاریم اٹ اتنگ ءِ، دا اصلی اپوزیشن اف بلکن گیشتر سیاسی راہشون تینا فائدہ غاتے بچفنگ کن یکجا مسنو۔ سینیٹر فیصل جاوید پارے کہ مسلم لیگ ن و پیپلزپارٹی نا بھاز انگا سیاست دان ڈوہدار ءُ و نن ڈوہدار تے نرنگ کن الیپنہ۔
