عدالت عالیہ نا پرمان تیان پد ہم پی ڈی ایم ملتان جلسہ، اپوزیشن توہین عدالت نا مرتکب مسنے، پی ڈی ایم جلسہ منتظمین و سرکڑدہ غاتا برخلاف ایف آئی آردرج کننگ انگ ءِ
اسلام آباد۔ 01 دسمبر (اے پی پی) بنجائی وزیر حوالکاری و شینکاری سینیٹر شبلی فراز پارینے کہ عدالت عالیہ نا پرمان تیان پد ہم پی ڈی ایم ملتان جلسہ، اپوزیشن توہین عدالت نا مرتکب مسنے، پی ڈی ایم جلسہ منتظمین و اوار مروک آ سرکڑدہ غاتا برخلاف ایف آئی آردرج کننگ انگ ءِ، آخبت ہم ہرا عدالتی پرمان و این سی او سی سلاہ و سوج آتیا خلوک پابندی تا خلاف ورزی ءِ کیک اونا برخلاف ہنداوڑ کارروائی کننگک، کورونا دین انا ارٹمیکو ریسہ نا سوب آن مچ آ ملک اٹی جلسہ جلوس آتیا پابندی خلوک ءِ، پی ڈی ایم داسہ لاہور جلسہ نا ہیت کننگ ءِ اوفتے لاہور جلسہ غان توپنہ ولے اوفتا برخلاف کانودی کارروائی المی مریک، نواز شریف، شہباز شریف و مریم نواز تون اوار مسلم لیگ ن نا سرکڑدہ غاتا مچ آ سیاست دروغ آ مبنی ءِ۔ دامخلوق زند اٹی اس ہم راست پاتنو۔ سے شنبے نادے آ وزیراعظم عمران خان نا کماشی ٹی بنجائی کابینہ نا دیوان آن پد خصوصی کمکار جان جوڑی ڈاکٹر فیصل سلطان تون اوار میڈیا ءِ بریفنگ ترسا بنجائی وزیر حوالکاری و شینکاری سینیٹر شبلی فراز پارے کہ اسلام آباد ہائی کورٹ و این سی اوسی نا سلاہ و سوج آتے مون آ تخسا مچ آ ملک اٹی جلسہ جلوس آتیا پابندی خلوک ءِ تانکہ کورونا دین مچی تا کمک اٹ تالان مف اوکان پد ہم اپوزیشن پی ڈی ایم نا پلیٹ فارم آن ملتان اٹی ارٹ میکو جلسہ ءِ کرینے، ملتان نا الس نا منت واری ءِ ہرفنہ، 25لکھ انا آبادی نا علاقہ غان بیرہ منہ ہزار بندغ نا بشخ ہلنگ و سندھ آن اتوک آ 3 ہزار بندغ آتا بشخ ہلنگ دا پک کیک کہ پشاور آن پد ملتان نا الس پی ڈی ایم ءِ مسترد کرینو، ملتان پی ڈی ایم نا جلسہ ٹی نیزگار الس نا ہیت ءِ کننگتو، پی ڈی ایم والاک زہر آلود زبان ءِ استعمال کریر، دا مخلوق جند انا فائدہ و تینا خاہوت آتے فائدہ تننگ تون اوار اوار غیر کانودی دولت نا رکھ اکن داوڑنا ناٹک کننگ ءُ، پی ٹی آئی حکومت داڑآن ہبکہ مروک اُس اف، پی ٹی آئی داخہ در بھلو جلسہ کرینے ہرانا ریکارڈ اینو اسکان پِننگ کتنے۔ اوپارے کہ جند انا فائدہ غاتیٹی داخہ در کورمننگپ کہ الس نا جان تا رکھ ءِ گیرام کننگے، کیہی ملک آتیٹی تو کورونا دین انا تالانی آ کرفیو و پورو لاک ڈاؤن نافذ کننگانے ولے ننا اپوزیشن ہٹ دھرمی نا درشانی ءِ کننگ ءِ۔ اوپارے کہ اپوزیشن اگہ ہنداوڑ کورونا بچفنگ ایس او پی تا خلاف ورزی ءِ کرسا کرے تو کورونا دین انا تالانی پین ودک، نام نہاد سیاست دان تا لکھ آ مخلوق نا جان تے خطرہ ٹی بٹنگ نا منطق سمجھ آن پیشن ءِ۔ اوپارے کہ ملتان اٹی پی ڈی ایم جلسہ نا منتظمین و داٹی بشخ ہلوک سرکڑدہ غاتیا مقدمہ درج کننگک انتئے کہ ہرکس کہ کانود و عدالتی پرمان تا خلاف ورزی ءِ کیک اونا برخلاف ضرور کارروائی مریک۔ اوپارے کہ اپوزیشن ملکی زرگزران، روزگارنا بحالی نا سفر ءِ توننگ و ہسپتال آتیا زور شاغسا تینا جند انا فائدہ غاتے دوئی کننگ خواہک، ولے اوفتے ہچ ءُ ریلیف اس رسینگپک۔ اسہ سوج اسے نا ورندی ٹی بنجائی وزیر سینیٹر شبلی فراز پارے کہ نواز شریف و شہباز شریف تون اوار مسلم لیگ ن نا بڑزکو سرکڑدہ غاتا سیاست دروغ آ مبنی ءِ، مریم نواز زند اٹی اسُل راست پاتنے۔ اوپارے کہ اسحاق ڈار ءِ انت ضرورت ئس کہ او ہارڈ ٹاک شو اٹی ہنسا تینا بے عزتی ءِ کرفوسس و نواز شریف ءِ ڈوہدار پاننگ آ بیوس مروسس۔ وزیراعظم نا خصوصی کمکار جان جوڑی ڈاکٹر فیصل سلطان پارے کہ کورونا دین ویکسین نا دوئی کننگ نا حکمت عملی، وڑوڈول، افادیت، رکھ انا کہول و سیفٹی تون اوار 7 ٹک آتیا تالان وڑوڈول کابینہ نا مون آ تخنگا کابینہ دانا اصولی منظوری ءِ تسنے۔ ویکسین نا دوئی کننگ کن چندی کمپنی شارٹ لسٹ کننگانو، ویکسین نا ہلنگ نا عمل ءِ شفاف کننگ کن کابینہ نا غٹ کمیٹی نا اڈتننگ تون اوار اوار، ویکسین نا دوئی کننگ کن اسٹ آن زیات ذریعہ کاریم اٹ اتنگ نا ہم فیصلہ ءِ کننگانے۔
