صوابی۔ 01 دسمبر (اے پی پی) اسپیکر قومی اسمبلی اسد قیصر صوابی نا علاقہ چھوٹا لاہور اٹی جائیداد نا جھیڑہ غا سم کاری ٹی قتل مروک آ بندغ آتا خاہوت تون ہڑزخواہی کرے و معاملہ ءِ جرگہ نا کمک اٹ ایسر کرفنگ کن تینا کڑد ءِ ادا کننگ نا عزم انا درشانی ءِ کرے۔ سے شنبے نادے آ اسپیکر قومی اسمبلی اسد قیصر و صوبائی وزیر شہرام خان ترکئی کہوک آتا خاہوت نا اُراغا ہنا و پدسلوک آتون ہمدردی و ہڑزخواہی کرے۔ داوخت آ اسپیکر قومی اسمبلی و صوبائی وزیر میڈیا تون گپ وتران اٹی پاریر کہ تینا تینا علاقہ غاتیٹی امن وا یمنی کن الس جرگہ جوڑکیر انتئے کہ مخلوق ءِ ہم امن و ایمنی ٹی تینا کڑد ءِ ادا کروئی مریک۔ اسپیکرپارے کہ ننے خوشی ءِ اینو لاہور و سندھ اٹی ہم جرگہ مننگ ءِ۔ دامعاملہ ءِ ہم زیات مرغن کننگپ و جرگہ نا کمک اٹ ویل ءِ افہام و تفہیم اٹ ایسر کننگے۔ صوبائی وزیر شہرام ترکئی پارے کہ صوبائی حکومت بنجاتون اواری اٹ کاریم کننگ ءِ۔ دامعاملہ نا ایسری کن نن داجاگہ نا مخلوق تون ہم ملنگ اُن۔ اصلاحی جرگہ و الس آن خواست ءِ تینا کڑد ءِ اداکیر۔ چارشنبے نادے آ دیوان مریک و انتظامی آفیسر آتون معاملہ ءِ تولسا طے کینہ۔ مخلوق آن خواست ءِ کہ او صبر آن کاریم ہلیر۔
