اسلام آباد۔ 01 دسمبر (اے پی پی) صدر مملکت ڈاکٹر عارف علوی پارینے کہ چین اتون سنگتی پاکستان نا خارجہ پالیسی نا اہم تمبہ ءِ، پاکستان ڈیہہ ءِ مون تروک سیکورٹی چیلنج آتامقابلہ ءِ کننگ کن چین اتون تعلقداری تے پین سوگو کننگ خواہک۔ سے شنبے نادے آ ایوان صدر نا میڈیا ونگ آن جاری بیان نا رداٹ داخیال آتا درشانی ءِ او چینی وزیر دفاع جنرل وی فنگ ہی تون گپ وتران کرسا کرے ہرا داڑے اوڑتون اوڑدہی کرے۔ اوڑدہی ٹی صدر مملکت پارے کہ ہڑتوم آ ملک آتا تین پہ تینی فائدہ غاتیکن سنگتی ءِ پین سوگو کننگ نا عزم انا درشان، چین اتون سنگتی پاکستان نا خارجہ پالیسی نا اہم تمبہ ءِ۔ اوپارے کہ پاکستان ڈیہہ ءِ مون تروک سیکورٹی چیلنج آتا مقابلہ ءِ کننگ کن چین اتون تعلقداری تے پین سوگو کننگ خواہک۔ پاکستان ون چائنہ پالیسی، تائیوان، تبت، سنکیانگ و بحیرہ سویلی چین آ چین نا مخ تفی ءِ کیک۔ اوپارے کہ بھارتی بالادستی نا عزم آن علاقائی امن و سوگوی ءِ گڑتی مون تروک ءِ۔ بھارت بلوچستان اٹی دہشت گردی نا سرجزآتیٹی اوار و چین پاکستان اقتصادی راہداری ءِ لتاڑنگ خواہک۔ صدر عارف علوی چین نا زرگزرانی شونداری و چینی حکومت نا کورونا دین انا برخلاف گام گیج آتا ستاءِ کرے و کشمیر نا ویل آ سلامتی کونسل نا دیوان ءِ بٹنگ انگ آ چینی مخ تفی نا ستاءِ کرے۔ اوپارے کہ ہڑتوم آ ملک آتا نیام اٹ دفاعی کمکاری ءِ پین ودفنگ نا گرج ءِ۔ داوخت آ جنرل وی فنگ ہی پارے کہ پاکستان و چین نا نیام اٹ فوجی تعلقداری ٹی نمان پیش رفت مسنے و اومیت ءِ کہ دادورہ غان دفاعی کمکاریءِ پین سوگوی رسینگک۔چین پاکستان تون شونداری نا فائدہ غاتے بشخنگ خواہک ہرا پاکستان نا زرگزرانی شونداری ٹی کمکار مریرہ۔ چینی وزیر دفاع کورونا نا دین اٹی طبی گڑاتا گدریفنگ و مارچ 2020ء ٹی چین نا دورہ ءِ کروک آ اسٹ انگا درملکی شخصیت مننگ آ صدر ڈاکٹر عارف علوی نا منت واری ءِ ہرفے۔ چینی وزیر دفاع پارے کہ صدر پاکستان نا کنڈآن اودے نشان امتیاز(ملٹری) نا ایوارڈ تننگ ہڑتوم آ ملک آتا نیام اٹ حقی سنگتی نا ڈیک ءِ۔
