کوئٹہ۔30نومبر (اے پی پی):ترجمان حکومت بلوچستان لیاقت شاہوانی ءَ گشتگ کہ کوئٹہ ءَ ہوار سرجمیں صوبہ کجام جاہ ءَ پرائیویٹ وانگ جاہ پچ بنت انتظامیہ آیاں بند کنت چیا کہ کورونا وائرس ءِ دومی بر گیش ترند اِنت ءُ ما نودربرانی زنداں ھترہ ءِتہ ءَ دور دات ناکناں، کورونا ءِ کیس روچ پہ روچ گیش بوہگءَاَنت ءُ کوئٹہ ءِ نادراہ جاہ آں جاہ کم بوہگ ءَ اَنت، درائیں ایس اوپیز آنی سرءَ عمل ناکنوکاں ملام جنگ بوہگ ءَ اِنت، پی ڈی ایم ءَ امیچو جلسہ کتگ بلے ایس اوپیز آنی سرءَعمل ناکتگ۔ اے ھیالانی درشانی آئی ءَ دوشمبے ءِ روچءَ آفیسر کلب کوئٹہ ءَ پیریس کانفرنس ءَ گوں تران کنانءَکتگ، بلوچستان حکومت ءِ جارچین لیاقت شاہوانی ءَ گشتگ کہ پی ڈی ایم ءِ کوئٹہ جلسہ ءَ پد کورونا کیس 3 درسد گیش بوتگ اَنت وہدے کہ اپوزیشن جماعت آنی پشاور جلسہ ءَ پد ہم کورونا ءِ کیس گیش بوتگ اَنت، مرچیگیں ملتان ءِ جلسہ اگاں کورونا شنگ بہ بیت سرجمیں ملک ءَ نقصان بیت، بلوچستان حکومتءِ جارچین لیاقت شاہوانی ءَ گشتگ کہ ما اولی روچءَ تفتان سیمسر بند کتگ بوتگ چیا کہ ماسرپد بوتگ اَنت کہ کورونا ایچ وڑیں سیمسرآں نامن ایت، اے کورونا درائیں صوبہ آں جلسہ کنگ ءَ شنگ بیت ما دزبندی کتگ کہ کورونا ءِ دومی لہر اتگک جلسہ مکن اِت، کورونا وائرس ءِ اولی فیز گرماگ ءَ بوتگ پہ ہمے ھاترءَ اینچو تُرسناک نابوتگ بلے نو زمستان ءِ سوب ءَ گیش ترند اِنت۔ آئی ءَ گشتگ کہ دزبندی کناں کہ مزنیں جلسہ گاہ ءِ نیمگ ءَ کورنٹائن ڈیکلیئر کنگ بہ بیت۔ اولی فیز ءَ درائیں اپوزیشن ءَ ایس او پیز ءَ را من اِتگ۔ آئی ءَ گشتگ کہ اولی لاک ڈاؤن ءَ کرفیو کنگ ءَ 8 لکھ مردم بے روزگار بوتگ اَنت وہدے کہ بلوچستان حکومت ءَ را ارباں کلدار ءِ نقصان بوتگ۔ گورنمنٹ ءَ را ترندیں فیصلہ کنگ لوٹ ایت۔ صوبائی حکومت ءِ جارچین لیاقت شاہوانی ءَ گشتگ کہ این سی او سی ءِ فیصلہ ءِ روژنائی ءَبلوچستان ءَ پرائمری وانگ جاہ آں ہوار دراہیں وانگ جاہ بند کنگ ءِ فیصلہ کنگ بوتگ کہ ہرجاہ ءَ وانگ جا ہ پچ بنت آ چہ انتظامیہ ءِنیمگ ءَ بند کنگ بنت۔
