اسلام آباد۔ 30 نومبر (اے پی پی) اینخو سال انا مسٹ میکو قومی انسداد پولیو مہم اٹی 39 ملین آن زیات چناتے پولیو آن بچفنگ نا پُڑی کنفنگک، مہم اٹی 2 لکھ 85 ہزار پولیو ورکراُرااُراغا ہنسا پنچ سال اسکان نا چناتے پولیو آن بچفنگ نا پُڑی کنفرہ۔ دوشنبے نادے آ وزارت جان جوڑی آن جاری بیان نا رداٹ وزیراعظم نا خصوصی کمکار جان جوڑی ڈاکٹر فیصل سلطان پارے کہ حکومت پاکستان ءِ پولیو آن پاک کننگ کن سنبرینگوک ءِ۔ نن چناتیٹی قوت مدافعت ءِ ودفنگ کن پبی کوشست کننگ اُن۔بدبختی اٹ کورونا دین انا سوب آن چناتا قوت مدافعت اٹی کمتی بسنے۔ ای غٹ لمہ و باوہ غاتیان خواست کیوہ کہ پولیو آن بچفنگ اٹ او ننتون تینا کڑد ءِ ادا کیر و مہم اٹی تینا چناتے پولیو آن بچفنگ نا پُڑی ضرور کنفر۔ اومستی پارے کہ نن اواری اٹ جان جوڑ و پولیو آن پاک پاکستان نا ہدف ءِ دوئی کننگ کینہ۔ مہم اٹی پولیو ورکرآک کورونا نا قاعدہ و ضابطہ، (ایس او پی) تیا عملدرآمد کرسا مہم ءِ چلیفرہ۔ ماسک، ہینڈ سینیٹائزر نا کاریم اٹ اتنگ و راجی فاصلہ ءِ پک کینہ۔ بیان نا رداٹ مہم اوغانستان تون اسہ ہی وخت اٹی مننگ ءِ تانکہ دین انا گچین وڑاٹ مونءِ توننگ مرے۔ بیان اٹی کوآرڈینیٹر قومی ایمرجنسی آپریشنز سینٹر ڈاکٹر رانا محمد صفدر پارے کہ اینخو سال سرسہب پولیو مہم آتیان بھلو کچ اسے آ چناتا قوت مدافعت اٹ ودکی مریک و دین انا مون ءِ توننگ اٹ گچینی نا سوب ءِ۔ اومستی پارے کہ غٹ لمہ و باوہ داہیت ءِ پک کیر کہ پنچ سال اسکان نا چناتے پولیو آن بچفنگ نا پُڑی ضرور کنفر۔ غٹ مکتبہ فکر بشمول میڈیا، مذہبی راہشون، پنی آ شخصیت، ڈاکٹرز و ایلو بشخ آتا مخلوق مہم نا سرسہبی ٹی تینا کڑد ءِ ادا کیر۔ پاکستان و اوغانستان دنیا ٹی اِرا ملک ءُ ہراڑے پولیو وائرس ارے۔ پاکستان ءِ ساڑی وخت اٹی پولیو کیس آتیٹی ودکی نا سوب آن دین انا تالانی نا مون تروک ءِ۔ اینخو سال پولیو نا 81 کیس رپورٹ مسنو ہرافتے ٹی بلوچستان آن 23، خیبرپختونخوا 22، سندھ 22وپنجاب آن 14 کیس رپورٹ مسنو۔
