راولپنڈی۔ 30 نومبر (اے پی پی) پاکستان ریلوائی کورونا نا دین انا سوب بند کروک آ اِرا ٹرین کوہاٹ ریل کار و لاہور ریل کار سبک خرام ءِ بحال کرے۔ ٹرین تا بحالی نا بناءِ بنجائی وزیر ریلوائی شیخ رشید احمد دوشنبے نادے آ راولپنڈی ریلوائی اسٹیشن آ کرے۔ کوہاٹ ریل کار 9 بوگی اتون 850 مسافر آتا گنجائشت تخک و راولپنڈی آن کوہاٹ اسکان نا کِرا230 روپئی ءِ۔ کوہاٹ ریل کار انا سفر نا وخت ءُ پاس مسہ نیم گھنٹہ مریک۔ کوہاٹ ایکسپریس کوہاٹ آن سہب انا ہفت ءُ نیم بجہ غا روانہ مریک وخت اس کہ راولپنڈی آن پدی بننگ دے انا مسہ نیم بجہ غا مریک۔ کسر اٹی گولڑہ شریف، ترنول، فتح جنگ، بسال شریف، بسال دومیل، جنڈ و بابری بانڈہ ٹی اسٹاپ تننگانے۔ لاہور ریل کار سب خرام شاہ چار ءُ نیم بجہ غا اسہ وخت اٹی لاہور و راولپنڈی آ روانہ مریک و نہہ نیم بجہ غا تینا مزل آ سرمریک۔ لاہور ریل کار اٹی 690 مسافر سفر کننگ کیرہ۔ دا ٹرین چکلالہ، گوجر خان، جہلم، لالہ موسیٰ،گجرات، وزیر آباد و گوجرانوالہ ٹی اسٹاپ کیک۔ ٹرین بحالی اتون اوار اوار کورونا ایس او پی تیا سختی اٹ عملدرآمد کننگک و بیدس ماسک سفر کننگ نا موکل مفک۔
