اسلام آباد۔ 30 نومبر (اے پی پی) انفارمیشن ٹیکنالوجی نا سہی کاریم اٹ اتنگ و اسمگلر آتا برخلاف سرسہب آپریشن نا سوب آن اسمگلنگ نا توننگ اٹ خاطر خواہ سرسہبی دوئی مس و ہندی صنعت ءِ مون آ دننگانے۔ فیڈرل بورڈ آف ریونیو(ایف بی آر) نا رداٹ کورونا دین انا سوب آن ڈیمانڈ اٹی کمتی آن پد ہم ملک اٹی ٹیکسٹائل نا صنعت مون آ ہِننگ ءِ ہرانا سوب آن اسمگل مروک آ گڑاتا عدم دستیابی ءِ۔ حکومت اسمگلنگ نا توننگ کن گام گیج درستی راستی کرفینے۔ ایف بی آر نا رداٹ پاکستان کسٹم پی ٹی اے نا شریداری اٹ ڈربس ڈی آئی آر بی ایس پنی ءُ نظام اس دراستی راستی کرفینے تانکہ موبائل فون تا رجسٹریشن ءِ کننگ مرے۔ دا نظام نا سوب آن اسہ ہم نان ڈیوٹی پیڈ یا اسمگل مروک آ فون پاکستان اٹی واجب الادا خراج آتا زرتس و پی ٹی اے آن رجسٹریشن آن بیدس کاریم اٹ اتنگ مفک۔ سال 2019-20ء ٹی پاکستان کسٹم دا نظام نا سوب آن 54 ارب روپئی نا ریونیو دوئی کرینے۔ داسرسہب گام گیج آتا سوب آن مچ آ ملک اٹی زرکاری ءِ مون آ دننگانے و داسہ ہفدہ کمپنی پاکستان اٹی موبائل فون تیار کننگ ءُ۔ اسمگلنگ نا توننگ آ ہلوک آ ارٹمیکو ساڑی گام گیج آتا ذکر ءِ کرسا ایف بی آر پارے کہ سیکرٹری داخلہ نا کماشی ٹی و ایلو کانود نافذ کروک آ ادارہ غاتا باسک آتیا تالان اسہ قومی سٹیرنگ کمیٹی اس ٹہیفنگانے ہراکہ باقاعدگی اٹ دیوان کیرہ و اسمگلنگ نا توننگ و غٹ کانود نافذ کروک آ ادارہ غاتا شریداری ءِ پک کننگ کن حکمت عملی ترتیب ایترہ۔ پاکستان کسٹم اینخو مالی سال انا اولیکو چار تُو اٹی اولیکووار 23 ارب روپئی مالیت نا اسمگل مروک گڑاضبط کرینے ہرا تدوک آ سال انا نسبت 43 درسد زیات ءُ۔ کسٹمز ایکٹ 1969اٹ ترمیم کننگانے تانکہ اسمگلنگ کروک آ بندغ آتا جائیداد و گودام تا ضبطگی، جرمانہ و دہ سال اسکان سزا تننگ مرے۔
