اسلام آباد۔ 28 نومبر (اے پی پی) وزیراعظم عمران خان پارینے کہ نواز شریف و آصف علی زرداری ہڑتوم آک سلیکٹڈ ئسر، ای 22 سال انا جہد آن پد اقتدار اٹی بسونٹ، کنے سلیکٹڈ پاننگ عجیب ءُ ہیت اسے، مریم نواز مسڑ اس مننگ و بلاول بھٹو پرچی نا سوب آن پارٹی پوزیشن اٹ بسر، پاکستان ءِ فلاحی ریاست اس جوڑ کننگ کنا مسخت ءِ، اصل مسخت میچ ءِ کٹنگ مریک، ہدف نا دوئی کننگ کن حکمت عملی ءِ بدل کروئی تمک، ہرافک آزموندہ تخپسہ او یوٹرن نا ہیت ءِ کیرہ، فوج انا زور اسے نئے نیام تمنگ اسے، فیصلہ غاتے تینٹ کیوہ، مچ آ خارجہ پالیسی حکومت نا ءِ، پوسکن آ پاکستان ہاؤسنگ و بنڈل آئی لینڈ آشوبی ڈٹ ءُ، 5 سال اٹی اسہ کروڑ آن زیات نوکری و 50 لکھ آن زیات اُراتننگ کن سنبرینگوک اُٹ، لیفٹیننٹ جنرل (ر) عاصم سلیم باجوہ ءِ آزموندہ نا بنداو آ سی پیک اتھارٹی نا چیئرمین خلنگاسس، اوڑآ خلوک آ دوبہ غاک دروغ ئسر ہنداخاطرآن اودے کاریم ءِ برجاتخنگ نا پارت کریٹ، کس اسے اعتراض ارے تو نیب اتون رجوع کے، نواز شریف و آصف علی زرداری نا کرپشن آ ڈاکیومینٹری جوڑ مس، اپوزیشن بیرہ این آر او خواہک، ہرکس کہ قوم انا پیسہ غاتے پُلانے اونا پورو احتساب مرے، فنانشل ایکشن ٹاسک فورس (ایف اے ٹی ایف) کانود جوڑ کننگ نا معاملہ غا اپوزیشن بلیک میل کننگ نا کوشست کرے، ہراتم این آر او تتون تو اپوزیشن حکومت ءِ بٹنگ کن تحریک نا بناءِ کرے، بورہ نا تنکی نا جاست وپاست مننگ ءِ، جاست وپاست اٹ نیام تمپرہ، اوار زموار آتے کانود نا رداٹ سزا تننگک، فردوس عاشق اعوان آ کرپشن نا ہچ ءُ دوبہ اس الوکہ، وزیر و سلاہکار تیا لگوک آ دوبہ غاتا تینٹ جاست وپاست ءِ کرفیوہ، نواز شریف ءِ پیشن آ گدریفنگ آ ہچ کس نا دباؤ الوکہ، میڈیکل رپورٹ آتا بنداو آ اودے درمان کن پیشن نا ملک آ گدریفنگاسس، پنچ سال پورو مننگ آ عثمان بزدار پنجاب نا تاریخ نا غٹ آن سرسہب و نمبر اسٹ وزیراعلیٰ مریک۔ ہفتہ نادے آ نجی ٹی وی چینل ءِ تروک آ خصوصی انٹرویو ٹی وزیراعظم عمران خان پارے کہ 40 سال آن میڈیا ٹی اُٹ، اسہ پاکستان اس ہم داخہ در ہُرے اسکان میڈیا ٹی متنے، کرکٹ آن پد سیاست اٹ میڈیا ٹی مسونٹ، تنقید راج انا بشخ اسے، انسان نا سوچ انا مون آ ہِننگ اٹ آجوئی سلاہ درشانی نا غٹ آن بھلو دُو اس مریک، ہر اسٹ ءِ درشانی سلاہ نا آجوئی و حکومت یا ادارہ اسے آ تنقید کننگ نا بایدے موکل مرے، بحیثیت کرکٹر ہم کنے آ تنقید مسکہ۔ اوپارے کہ ہراسٹ زند انا مقابلہ ءِ کرے ہمو یوٹرن ءِ سرپند مننگ کیک، کٹنگ کن پدریسہ حکمت عملی ءِ بدل کروئی تمک، پاکستان ءِ فلاحی ریاست اس جوڑ کننگ کنامسخت ءِ و دا مسخت نا دوئی کننگ کن کنے پدریسہ تینا حکمت عملی ءِ ہُروئی تمک، ہرافک آزموندہ تخپسہ او یوٹرن نا ہیت ءِ کیرہ۔ وزیراعظم عمران خان پارے کہ نواز شریف و آصف علی زرداری ہڑتوم آک سلیکٹڈ ئسر، او گچین کاری کرسا و جہد کرسا بتویسر، جنرل جیلانی نواز شریف ءِ وزیر خزانہ و جنرل ضیاء وزیراعلیٰ جوڑ کرے غٹ چارہ، مریم نواز ءِ مسڑ مننگ نا سوب آن وخت اس کہ بلاول بھٹو ءِ پرچی نا بنداو آ پارٹی پوزیشن ملا، ای 22 سال انا جہد آن پد اقتدار اٹی بسونٹ، کنے سلیکٹڈ پاننگ عجیب ءُ ہیت اسے۔ اوپارے کہ اپوزیشن جماعت آک 2018ء نا گچین کاری تیا سوج کیرہ، فافن تینا رپورٹ اٹی 2013ء نا مقابلہ ٹی 2018ء نا گچین کاری تے گچین گونداسس۔ 2013ء ٹی نیشنل اسمبلی ٹی 133 پٹیشنز فائل مس وخت اس کہ 2018ء ٹی 102 پٹیشن دائر کننگا، 2018ء نا گچین کاری تا بابت ن لیگ و پی پی ءِ ملفسا 24 پٹیشن ئسر وخت اس کہ تحریک انصاف نا 23 پٹیشن ئسر، حساب وکتاب آن پک مریک کہ 2018ء نا گچین کاریک شفاف ئسر۔ وزیراعظم عمران خان پارے کہ فوج انا حکومت آ زور ءِ و نئے مداخلت، مچ آ خارجہ پالیسی تحریک انصاف نا ءِ، انت انت اس کہ منشور اٹی ئسر اوفتیا عملدرآمد کننگ انگ ءِ، نن خواہسنہ کہ مسلم ملک آتا نیام اٹ تنازعہ ٹی فریق مفن، ہنداوڑ مہالو پاریسن کہ اوغان ویل انا ایسر جنگ اف، او ہیت آک راست مسنو، اپوزیشن ہندن ءُ درور اس ایتے ہراڑآن دالگے کہ کنے آ فوج انا زور ءِ۔ اوپارے کہ لیفٹیننٹ جنرل (ر) عاصم سلیم باجوہ نا تعیناتی کن فوج انا زورالوکہ، اودے آزموندہ نا بنداو آ سی پیک اتھارٹی نا چیئرمین خلنگاسس، داڑتون اوار اوار اودے حوالکاری و شینکاری نا زمواری تننگ نامسخت وزارت حوالکاری ٹی اصلاحات کن روڈمیپ اس تننگ ئس، عاصم سلیم باجوہ تینا زی آ لگوک آ دوبہ غاتا سرجم ورندی ءِ تس، اگہ اونا برخلاف کس اسے تون شاہدی ارے تو او نیب اتون رجوع کننگ کیک۔
