اسلام آباد۔ 28 نومبر (اے پی پی) وزیر خارجہ مخدوم شاہ محمود قریشی و اونا سوڈانی ہم منصب عمر قمرالدین اسماعیل نا نیام اٹ نائیجر نا دارالحکومت نیامی ٹی او آئی سی وزراء خارجہ کونسل نا 47 می دیوان نا وخت آ اوڑدہی مس۔ ترجمان دفترخارجہ نا رداٹ اوڑدہی ٹی کڑدہ غاک ہڑتوم آ کنڈآتا و تین پہ تینی است خواہی نا علاقائی باندات آ گپ وتران کریر۔ وزیر خارجہ غاک ہڑتوم آ ملک آتا نیام اٹ سیکورٹی، تعلیم، جان جوڑی، کشت وکشار تون اوار چندی بشخ آتیٹی کمکاری ءِ مون آ دننگ آ امنا کریر۔ شاہ محمود قریشی پارے کہ پاکستان و سوڈان نا نیام اٹ اسیجاعقیدہ و نظریہ غاتا بنداو آ خڑکی برادرانہ تعلقداری ءِ۔ وزیر خارجہ 1.3 ارب آبادی و 54 ملک آتیا تالان براعظم افریقہ نا اہمیت ءِ تالان کرے۔ وزیر خارجہ قریشی سوڈانی ہم منصب ءِ پاکستان نا ‘‘ انگیج افریقہ’’ گام گیج انا بارواٹی ہم معلومدار کرے۔
