اسلام آباد۔ 28 نومبر (اے پی پی) وزیر خارجہ شاہ محمود قریشی ہفتہ نادے آ نائیجر نا دارالحکومت نیامے ٹی او آئی سی وزراخارجہ کونسل نا 47 می دیوان نا وخت آ افریقی ملک صومالیہ، نائیجر و سوڈان نا وزیر خارجہ غاتون جتا جتا اوڑدہی کرے۔ ہر مسٹ آ ملک آک واپاری و اقتصادی و ہڑتوم آ کنڈآتا تعلقداری تے مون آ دننگ کن بڑزکو کہول آ رابطہ غاتے ودفنگ آ امنا کرینو۔ ترجمان دفترخارجہ نا رداٹ صومالیہ نا وزیر مملکت امور خارجہ بلال محمد عثمان نائیجر نا اوڑدہی ٹی ہڑتوم آ کنڈآتا تعلقداری تون کثیر الجہتی بشخ آتیٹی تین پہ تینی کمکاری ءِ ودفنگ نا بابت باندات آ گپ وتران کننگا۔ وزیر خارجہ صومالیہ تون واپار و زرکاری چندی بشخ آتیٹی ہڑتوم آ کنڈآتا کمکاری ءِ مون آ دننگ کن سنبرینگوک ءِ۔ صومالیہ ٹی جم حالیت آتا بارواٹ حوال تسا صومالی وزیر مملکت پارے کہ ملک اٹ امن وا یمنی نا حالیت آتیٹی گچینی بسنے۔ اوپارے کہ صومالیہ انسانی وسیلہ غاتا شونداری تون اوار اوار دہشت گردی نا برخلاف جنگ اٹ پاکستان نا چاہنداری تیان ہم فائدہ ہرفنگ نا خواہندار ءِ۔ وزیر مملکت پاکستانی زرکار آتے ہم صومالیہ ٹی زرکاری نا وارخواہی تیان فائدہ ہرفنگ نا سلہ خلک۔
