اسلام آباد۔ 28 نومبر (اے پی پی) پاکستان و متحدہ عرب امارات ہڑتوم آ کنڈآتا کمکاری ٹی پین ترندی اتنگ کن بڑزکو کہول آ تین پہ تینی ہن و بر تیٹی ودکی آ امنا کرینو۔ ترجمان دفترخارجہ نا رداٹ ہفتہ آ نائیجر اٹی او آئی سی وزراخارجہ کونسل نا 47 می دیوان ناوخت آ وزیر خارجہ شاہ محمود قریشی و یواے ای نا وزیر مملکت ریم الہاشمی نا نیام اٹ اوڑدہی مس۔ اوڑدہی ٹی کڑدہ غاک ہڑتوم آ کنڈآتا کمکاری، کوویڈ۔ 19 نا حالیت، ایکسپو ٹی پاکستان نا بشخ ہلنگ و تین پہ تینی است خواہی نا ایلو باندات آتیا گپ وتران کننگا۔ وزیر خارجہ ہڑتوم آملک آتا نیام اٹ خڑکی برادرانہ تعلقداری و الس نا نیام اٹ رابطہ غاتے تالان کرے و چندی بشخ آتیٹی متحدہ عرب امارات تون خڑکی کمکاری کن پاکستان نا عزم انا درشانی ءِ کرے۔ وزیر خارجہ اماراتی وزیر مملکت ءِ یواے ای ویزانا بابت پاکتسانی شاری تے مون تروک مشکل آتیان معلومدار کرسا داویل ءِ زوت آن زوت ایسر کننگ نا گرج آ زور شاغا۔ ہڑتوم آ کڑدہ غاک او آئی سی معاملہ غاتیا ہم گپ وتران کریر و امت مسلمہ کن متحدہ و بنداوی پلیٹ فارم نا حیثیت اٹ اودے پین سوگو کننگ نا اہمیت آ زور شاغار۔
