اسلام آباد۔ 27 نومبر (اے پی پی) این سی او سی نا دیوان اٹی غٹ صوبہ غاتا چیف سیکرٹریک ویڈیو لنک انا کمک اٹ بشخ ہلکر۔ فورم ءِ کورونا ناجوڑی نا تالانی آن معلومدار کننگا۔ جان جوڑی نا چاہندار آک فورم ءِ پاریر کہ ملک اٹی کورونا نا مثبت کیس آتا تناسب 7.20 درسد ءِ۔ غٹ آن زیات حساسیت نا تناسب پشاور اٹی 19.65درسد ہُننگا داکان پد کراچی ٹی 17.73 درسد و حیدر آباد اٹی 16.32 درسد تناسب ہُننگا۔مچ آ پاکستان اٹی 2 ہزار 112 کورونا نا ناجوڑ آتا حالیت نازرک ءِ و نازرک ناجوڑ آتا کچ ترندی اٹ ودنگ ءِ۔ چندی بنجائی اکائی تیٹی کورونا نا مثبت کیس آتا تناسب داوڑ ءِ۔ آزاد کشمیر اٹی 10.79درسد، بلوچستان اٹی 6.41 درسد، گلگت بلتستان اٹی 4.81 درسد، اسلام آباد اٹی 5.84 درسد، خیبرپختونخوا ٹی 9.25 درسد، پنجاب 3.59 درسد و سندھ اٹی 13.25 درسد۔ ہنداوڑاٹ صوبہ غاتیٹی کورونا دین انا مثبت کیس آتا تناسب نا رداٹ حالیت آک درج ذیل ءُ۔ پنجاب نا شار لاہور4.52درسد و راولپنڈی 11.49 درسد، سندھ انا شار تیٹی کراچی ٹی 17.73درسد، حیدر آباد اٹی 16.32درسد، خیبرپختونخوا نا شار پشاور 19.65درسد، بلوچستان نا شار کوئٹہ ٹی 9.77 درسد، اسلام آباد اٹی 5.84 درسد، آزاد کشمیرنا شار تیٹی میرپور اٹی 14.97درسد، مظفر آباد اٹی 10.34درسد، گلگت بلتستان نا شار گلگت اٹی 9.26درسد ءُ۔ فورم ءِ معلومدار کننگاکہ جان جوڑی نا راہشون اصول/ ہیلتھ پروٹوکول و عملدرآمد نا گام گیج آتا تعمیل آ بنجائی اکائی تا کمک اٹ عالم دین، میرج ہال ایسوسی ایشن تون میٹنگ کننگانے۔ بنجائی وزیر شونداری و ڈٹ بندی اسد عمر پارے کہ ننا بنداوی زمواری الس نا رکھ و جان جوڑی ءِ و وزارت جان جوڑی نا کمک اٹ وقتا فوقتا جاری کروک پارت آتا کمک اٹ غٹ المی گام گیج آتے پک کننگے۔ اسد عمر مستی پارے کہ آخبت چاروکی و حساب وکتاب نا وخت آ تعین و گمانی ناجوڑی نا تالانی نا جانچ اسٹ انگا گام گیج ءِ ہرانا کمک اٹ کورونا دین انا مون ءِ توننگ کن وخت آ و سہی فیصلہ سازی کننگ مریک۔ بنجائی اکائیک مسیت آتیٹی ایس او پی تا تعمیل و نفاذ نا گام گیج و عالم دین تا کمک اٹ دینی مرض انابارواٹی السی شعور نا سفت ءِ کرے۔
