اسلام آباد۔ 27 نومبر (اے پی پی) قومی احتساب بیورو(نیب) انا چیئرمین جسٹس جاوید اقبال پارینے کہ میگا کرپشن وائٹ کالر مقدمہ غاتے ایسر اسکان سرکننگ نیب انا اولیت ءِ۔ نیب احتساب غٹ اکن پالیسی آ عمل کرسا وڈی خوری نا چٹفنگ کن سنبرینگوک ءِ۔ داخیال آتا درشانی ءِ او نیب ہیڈکوارٹر اٹی آپریشن و پراسیکوشن ونگ انا کارکڑد نا جاچ انا بابت دیوان نا کماشی ءِ کرسا کرے۔ دیوان ءِ پاننگاکہ نیب انا آپریشنل و پراسیکوشن ڈویژن نا غاوتا جانچ پڑتال انکوائری، انوسٹی گیشن آتے کانود نا رداٹ سرتننگ، احتساب عدالت، ہائیکورٹ و سپریم کورٹ اٹی مقدمہ غاتا پیرویءِ کننگ کن غٹ علاقائی بیورو تے کانود کمک فراوان کننگ انگ ءِ۔ دیوان اٹی داہم پاننگانے کہ چیئرمین نیب جسٹس (ر) جاوید اقبال نا پارت آتیا آزموندہ کار لیگل کنسلنٹس و اسپیشل پراسیکوٹر تعینات کرسا پراسیکوشن ڈویژن ءِ اول سرآن ٹہیفنگانے۔ نیب انا کنڈآن علاقائی بیورو تیٹی شاہدی تے سرتننگ نا ہم وڑوڈول ءِ پیدوار کننگانے ہرانا بھرمک بھاز است بڈ ءُ۔ اوپارے کہ پراسیکوشن ڈویژن نا پدریسہ سلابت مانیٹرنگ و کارکڑد نا جاچ آن نیب انا مقدمہ غاتا جم سزا نا کچ کم و ود 68.8 درسد ءِ ، ہراکہ ادارہ اسے نا گچین کارکڑد ءِ۔ احتساب عدالت لاہور ریفرنس نمبر 50/2014, 51/2014, 52/2014, 53/2014, 54/2014نا فیصلہ ءِ بنفینے ہرانا رداٹ مرکزی دوبہ دار نذیر احمد خان ءِ ہر مقدمہ ٹی واجب الادا زر انا جم جرمانہ اتون اوار اوار 5 سال انا سزا بِنفنگانے۔ دوبہ دار نذیر احمد خان ءِ ریفرنس نمبر 50/2014ٹی 5118740 روپئی جرمانہ اتون اوار اوار 5 سال نا سزا، ریفرنس نمبر 51/2014 ٹی 7287692روپئی جرمانہ اتون اوار اوار 5 سال انا سزا، ریفنرنس نمبر 52/2014ٹی 24706125روپئی جرمانہ اتون اوار اوار 5 سال انا سزا، ریفرنس نمبر 53/2014ٹی 28059300 روپئی جرمانہ اتون اوار اوار 5 سال نا سزا بنفینے، احتساب عدالت لاہور ریفرنس نمبر 07/2007اٹی دوبہ دار غلام مصطفیٰ رندھاوا ءِ 5 سال انا سزا وخت اس کہ غلام مرتضیٰ رندھاوا ءِ چار سال انا سزا بنفینے وخت اس کہ ہڑتوم آ دوبہ دار آتے 50 پنجا لکھ روپئی جرمانہ نا سزا ہم بنفینے۔ جرمانہ نا زرتفننگ نا حالیت اٹ ہڑتوم آ دوبہ دار آتے 6 تُو پین سزا کاٹ کروئی مریک۔ دیوان ءِ پاننگا۔ احتساب عدالت لاہور ریفرنس نمبر 29/2019اٹی دوبہ دار ظہیر ناصر، مقصود احمد و ذیشان احمد ءِ ہفت ہفت سال قید و ہر اسٹ ءِ 5 پنچ لکھ روپئی نا سزا بنفنگانے۔ داہم پاننگاکہ احتساب عدالت لاہور دوبہ دار روف ارشد نا 1.843831 ملین روپئی پلی بارگین نا درخواست ءِ منظور کرینے۔ چیئرمین نیب جسٹس جاوید اقبال پارے کہ میگاکرپشن وائٹ کالر مقدمہ غاتے ایسر اسکان سرکننگ نیب انا اولیت ءِ۔
