اسلام آباد۔ 27 نومبر (اے پی پی) وزیر خارجہ شاہ محمود قریشی پارینے کہ پاکستان اوغانستان تون چندی بشخ آتیٹی ہڑتوم آ کنڈآتا کمکاری ءِ ودفنگ کن سنبرینگوک ءِ۔ وزیراعظم عمران خان نا ساڑی آ دورہ ٹی ہڑتوم آ کڑدہ غاتا کنڈآن جاری کروک’’اسیجائی ویژن‘‘ دا عمل ءِ مون آ دننگ اٹ کمکار مریک۔ داہیت ءِ او جمعہ نادے آ نائیجر اٹی مروک آ او آئی سی وزراء خارجہ کونسل نا 47 می دیوان نا وخت آ اوغانستان نا تینا ہم منصب حنیف اتمر تون اوڑدہی ٹی گپ وتران کرسا پارے۔ ترجمان دفترخارجہ نا رداٹ اوڑدہی ٹی کڑدہ غاک اوغان امن عمل وہڑتوم آ کنڈآتا تعلقداری ءِ پین سوگو کننگ نا بابت باندات آ گپ وتران کریر۔ وزیر خارجہ کابل و بامیان اٹ مروک آ ساڑی آ دہشت گرد جلہو آتیا تینا اوغان ہم منصب تون ہڑزخواہی کرے و پاکستان نا کنڈآن ہروڑنا دہشت گردی نا مذمت نا درشانی ءِ کرے۔ وزیر خارجہ بیدادی ٹی کمتی نا اہمیت آ زور ہم شاغا۔ اوغان امن عمل کن پاکسان نا مخ تفی نا درشانی ءِ کرسا، وزیر خارجہ پارے کہ پاکستان اوغان حکومت و اوغان الس نا کماشی ٹی امن عمل اٹ کمکاری فراوان کرسا کیک۔ انٹرا اوغان مذاکرات اٹی ساڑی آ پیش رفت نا ذکر ءِ کرسا، اوپارے کہ ننے امن نا کوشست آتے لتاڑوک آتیان ہم ہُشار مننگ نا گرج ءِ ہرا دا ڈیہہ ٹی امن ءِ ہُننگ خواپسہ۔ شاہ محمود قریشی داہیت آ زور شاغا کہ امن مذاکرات اسہ تاریخی ءُ موقع اسے، اوغان سرکڑدہ ءِ اوغانستان و ڈیہہ ٹی پائیدار امن و سوگوی کن داموقع غان فائدہ ہرفوئی مریک۔ وزیر خارجہ زرگزرانی و واپاری بشخ آتیٹی ساڑی زبردست وارخواہی تے کاریم اٹ اتنگ نا گرج آ ہم زور شاغا و پارے کہ اوغانستان اٹی امن و علاقائی رابطہ غاتے ودفسا داڑآن فائدہ ہرفنگ مریک۔ اوغانستان نا وزیر خارجہ امن عمل نا مخ تفی آ پاکستان نا مخلصانہ کوشست آتا ستاءِ کرے و وزیراعظم عمران خان نا ساڑی آ دورہ کابل و اونا اہم بھرم تیا منت واری نا درشانی ءِ کرے۔ اوجنیوا کانفرنس اٹی بشخ ہلنگ و اوغانستان نا تعمیر نو و زرگزرانی شونداری ٹی پاکستان نا مخ تفی نا درشانی ءِ کننگ آ وزیر خارجہ شاہ محمود قریشی نا منت واری ءِ ہم ہرفے۔
