ہفدہ می چائنہ آسیان ایکسپو ٹی پاکستان نا 14 کاروباری ادارہ غاتا بشخ ہلنگ ستاکڑزک، صدر مملکت ڈاکٹر عارف علوی

اسلام آباد۔ 27 نومبر (اے پی پی) صدر مملکت ڈاکٹر عارف علوی پارینے کہ 17 می چائنہ آسیان ایکسپو ٹی پاکستان نا کنڈآن 14 کاروباری ادارہ غاتا بشخ ہلنگ ستاکڑزک، چینی صدر شی جن پنگ نا کماشی ٹی چین بھازپت اتون کورونا دین انا مون ءِ تورے، دا ایکسپو نا اڈتننگ پک کیک کہ چین واپار نا بشخ اٹی دنیا ءِ سرکڑدہ ئی فراوان کرینے، چین پاکستان اقتصادی راہداری آن نیامی ایشیائی ملک آتون رابطہ جوڑ مریک۔ ایوان صدر نا میڈیا ونگ آن جاری بیان نا رداٹ دا خیال آتا درشانی ءِ او جمعہ نادے آ چین نا شار ناننگ گوانگشی ٹی 17 می چائنہ آسیان ایکسپو نا دود آن ورچوئل تران کرسا کرے۔ صدر مملکت پارے کہ ایکسپو ٹی پاکستان نا کنڈآن 14 کاروباری ادارہ غاتا بشخ ہلنگ ستاکڑزک۔ چینی صدر شی جن پنگ نا کماشی ٹی چین بھاز پت اتون کورونا دین انا مون ءِ تورے۔ اوپارے کہ دا ایکسپو نا اڈتننگ پک کیک کہ چین واپار نا بشخ اٹی دنیا ءِ سرکڑدہ ئی فراوان کیک۔ چین نا دے ٹکی ایشیائی ملک آتون ساڑی ٹی کروک آ غٹ آن بھلا واپاری معاہدہ چین نا اسہ پت انا قابل واپاری پارٹنر مننگ نا شاہدی ءِ۔ پاکستان و چین پت انا قابل سنگت ءُ و دا سنگتی سمندر آتیان کُڑمب و ہمالیہ آن بڑز ءِ۔ اوپارے کہ چین پاکستان اقتصادی راہداری آن نیامی ایشیائی ملک آتون رابطہ مریک۔ پاکستان و چین واپاری معاہدہ نا ارٹ میکو ریسہ غا دستخط کرینو ہرا جنوری 2020 آن فعال ءِ۔ نن پاکستان نا خصوصی اقتصادی زون اٹی آسیان ملک آتے زرکاری کننگ نا سلہ خلینہ، پاکستان نا میکرو زرگزرانی پالیسی تیٹی زبردست بدلی رونما مسنے۔ صدر مملکت پارے کہ پاکستان اٹ کاروبار کننگ اٹ آسانی ودی مسنے و کورونا غان پد ہم کاروبار اٹی گچینی بس۔ ننا دورس زرگزرانی و واپاری اصلاحات نا سوب آن گچین بھرم دوئی مس۔ پاکستان ءِ چین و آسیان ملک آتے ٹیکسٹائل، کنوئی آ گڑا، سُو، سوزی پین پین برآمد کننگ نا گرج ءِ۔ اوپارے کہ پاکستان فیفا ورلڈ کپ کن فٹ بال جوڑ کننگ ءِ۔ پاکستان اٹ زرکاری کننگ نا بھلو وارخواہی اس ساڑی ءِ۔ اوپارے کہ پاکستان نا آسیان ملک آتون شریداری و کمکاری ٹی ودکی مننگ ءِ۔