اسلام آباد۔27 نومبر(اے پی پی) پاکستان بیت المال چوری آ چناتیکن دارالاحساس، چائلڈ لیبر نا چٹفنگ نا ہند و وومن ایمپاورمنٹ سینٹر آتون اوار راج انا نیزگار بندغ آتے درمان نا آسراتی فراوان کننگ ءِ۔ پاکستان بیت المال نا کنڈآن چوری چناتیکن دارالاحساس نا جوڑ کننگ ہم ریاست مدینہ نا کنڈآ اسہ پین گام گیج اسے۔ مچ آ ملک انا ہر دارالاحساس ہند اٹی 4 آن 6 سال اسکان نا وئی نا 100چنارہینگ انگ ءُ۔ دارالاحساس اٹ رہینگوک آ چناتے اسہ خاہوتی یونٹ اٹے مفت فرنشڈ ہنکین، مفت متوازن غذا ہراٹی ناشتہ،پیشیم و شام انا کُن و خور، شار انا گچین اسکول آتیٹی میٹرک و اوکان مون انا تعلیم، مفت یونیفارم،کتاب و اسٹیشنری، سیڷ و تیرمہ نا لِویس، سرکاری ہسپتال آتیٹی طبی آسراتی، اسکلز ڈویلپمنٹ، مفت لانڈری خذمت، نماز نا آسراتی و دینی تعلیم نا آسراتی فراوان کننگ انگ ءِ۔ داکان بیدس بیدادی و بدسلوکی نا گواچی چناتے سلابت و کانودی امداد ہم فراوان کننگک۔ تدوک آ مالی سال 2019-20ء ٹی مچ آ ملک اٹی 1730 پوسکن آ چوری چناتے دارالاحساس اٹ رجسٹرڈ کننگا ہراڑے اوفتے اُرا کون آ چاگڑد اٹی ساف ستھرا کُن و خور و گچین تعلیم و تربیت ءِ ممکن کننگ انگ ءِ۔ پاکستان بیت المال اٹی انفرادی مالی معاونت(آئی ایف اے) پروگرام نا رداٹ نیزگار، جنوزان زالبول، بے سیخا زالبول، چوری و معذور بندغ آتا عمومی امداد، تعلیم، طبی درمان و بحالی نا کمک اٹ فراوان فراوان کننگ انگ ءِ۔ دا ڈٹ انا مسخت نیزگار بندغ آتا دمدستی کمک ءِ کننگ، نیزگار ناجوڑ آتے معذوری یا بھلو ناجوڑی اسے کن طبی امداد نا فراوانی، نیزگار بندغ آتے زرگزرانی وڑاٹ واکدار کننگ، سرکاری بشخ انا تعلیمی و تکنیکی ادارہ ٹی خوانوک آ حقدار و ہُشار نیزگار طالب علم آتے تعلیمی وظیفہ نا فراوانی ءِ۔ تدوک آ مالی سال اٹی 21618نیزگار ناجوڑ آتا مفت درمان ءِ ممکن کننگا ہراڑآ 2727 ملین روپئی خڑچ مس وخت اس کہ 36.28ملین روپئی نا زر آن 18141 حقدار ناجوڑ آتا خن تا موتی نا سرجری ءِ ممکن کننگا۔ نیزگار و نادار ولے ہُشار طالب علم آتے تعلیمی سفر آ راہی روان تخنگ کن تدوک آ مالی سال اٹی 155 ملین روپئی نا زر خڑچ کننگا ہراڑآن 5683 طالب علم فائدہ ہرفیر۔ داتم اسکان 51 چناتے’’کلیئر امپلانٹ‘‘ ترسا ہیت کننگ و بِننگ نا قابل کننگانے ہراڑآ 46.22 ملین روپئی خڑچ مس۔ انٹرنیشنل لیبر آرگنائزیشن (آئی ایل او) چائلڈ لیبر نا چٹفنگ نا پروگرام نا کمک اٹ 1996ء ٹی اسہ سروے اس کرے ہراٹی پاکستان اٹ پنچ آن 14 سال اسکان نا وئی نا 3.3 ملین چناتا پیدواری ءِ کننگا ہرافتیان جبری مشقت ہلنگاکہ۔ چائلڈ لیبر کون آ ویل آتیٹی ریاستی نیام تمنگ المی مسوسس۔ چائلڈ لیبر نا بابت قومی پالیسی و ایکشن پلان آف چائلڈ لیبر اٹ چناتتون مشقت نا دمدستی چٹفنگ آ چکار کننگا۔ چائلڈ لیبر نا گواچی چناتا بحالی کن پاکستان بیت المال اسکول 1995ء آن مچ آ ملک اٹی جوڑ ءِ۔ دا ہند آتیٹی 5 آن 14 سال اسکان نا وئی نا چناتے داخل کننگک ہراڑے اوفتے مفت تعلیم، لویس، بوٹ و وظیفہ تننگک۔ مچ آ ملک اٹی پاکستان بیت المال نا کنڈآن 159 چائلڈ لیبر نا چٹفنگ نا ہند جوڑ ءِ ہرافتیان پنجاب اٹی 73، سندھ اٹی 37، خیبرپختونخوا ٹی 24، بلوچستان اٹی 14، اسلام آباد/آزاد کشمیر و قطبی علاقہ غاتیٹی 11، ہند ءُ۔ چناتے چائلڈ لیبر آن نجات ترفسا پرائمری کہول اسکان مفت تعلیم فراوان کننگک۔ داوخت آ 17871طالب علم دا ہند آتیٹی پرائمری تعلیم آن فائدہ ہرفنگ ءُ۔ سال 2019-20ء ٹی دا اسکول آتیٹی 18519 چناتے رجسٹرڈ کننگا وخت اس کہ داتم اسکان 38059 چنافارغ التحصیل مسنو۔ تدوک آ مالی سال اٹی دا ڈٹ آ 712 ملین روپئی خڑچ کننگا۔ پاکستان بیت المال نا کنڈآن مچ آ ملک اٹی 155 ویمن ایمپاورمنٹ سینٹر زالبول آتے خودانحصاری نا سفر آ روان کننگ اٹ لگوک ءُ۔ پاکستان بیت المال نا وومن ایمپاورمنٹ سینٹرز 1995ء آن آزاد کشمیر و قطبی علاقہ غاتون اوار مچ آ ملک اٹی جوڑ ءُ۔ دا اسکول آتیٹی جنوزان، چوری، نیزگار مسن تے ڈرافٹنگ، کٹنگ، سلائی ، کڑھائی ، دُو و مشین اٹ ایمبرائیڈری تون اوار چندی چاہنداری تیٹی مفت تربیت فراوان کننگک۔ پاکستان بیت المال ہر ضلع ٹی اسہ ووکیشنل دستکاری اسکول اسے نا جوڑ کننگ نا ڈٹ اس کرینے۔ داوخت آ دا اسکول آتا کچ 155 ءِ ہرافتیان پنجاب اٹی 64، سندھ اٹی 30، خیبرپختونخوا ٹی 33، بلوچستان اٹی 18، اسلام آباد، آزاد کشمیر و قطبی علاقہ غاتیٹی 11 اسکول اوار ءُ۔ کم کٹیا کروک تپہ غاتیان تعلق تخوک آ زالبول و مسن تے اِرا شفٹ آتیٹی تربیت فراوان کننگک۔ مالی سال 2019-20ء ٹی 638 ملین روپئی نا زر آن 30 ہزار زالبول آتے کسبی تربیت فراوان کننگا۔ داکان فارغ مروک آ زالبول آتے پاکستان تخفیف غربت فنڈ انا کمک اٹ اسہ لکھ روپئی اسکان بے سود وام تننگک تانکہ اوتینا نت تیا سلنگ کیر۔ داوخت آ 13322 زالبول زیر تربیت ءُ وخت اس کہ داتم اسکان 135220 زالبول تربیت ءِ پورو کرینو۔ دا ڈٹ انا رداٹ بروک آ چار سال اٹی 62400زالبول آتے باعزت و باوقار زند اس تیر کننگ کن خودانحصار و خودکفیل جوڑ کننگک۔
