اسلام آباد۔ 26 نومبر (اے پی پی) اسپیکر قومی اسمبلی اسد قیصر تون پاکستان اٹی سعودی سفیر نواف سعید المالکی پنچ شنبےنادے آ پارلیمنٹ ہاؤس اٹی اوڑدہی کرے ہراٹی ہڑتوم آ کنڈآتا تعلقداری و تین پہ تینی است خواہی نا باندات آتیا گپ وتران کننگا۔ اسپیکر پارے کہ پاکستان سعودی عرب تون تینا خوشگوار برادرانہ تعلقداری تے قدر انا نظر اٹ ہرک۔ پاکستان ءِ سعودی عرب تون تینا سدابہار سنگتی آ گمرءِ۔ سعودی عرب پاکستان اٹی راجی شونداری کن مدام فراخ دلانہ کمک کرے۔ سعودی فرمانرواشاہ سلمان بن عبدالعزیز نا پاکستان نا سلامتی و شونداری کن تاثرآک ستاکڑزرہ۔ مسلم امہ ءِ مون تروک چیلنج آتیکن یکجہتی وخت انا اہم گرج ءِ، اسپیکر قومی اسمبلی پارے کہ ہڑتوم آ ملک آتا پارلیمان تیٹی پدریسہ رابطہ ہڑتوم آ برادر ملک آتیٹی تعلقداری تے سوگو کننگ اٹ اہم کڑد اس ادا کننگ کیک۔ پاکستان غٹ ہمسایہ ملک آتون خوشگوار تعلقداری خواہک و غٹ ایسر نا چاری باندات آتے مذاکرات نا کمک اٹ ایسر کننگ آ یخین تخک۔ سعودی ولی عہد شہزادہ محمد بن سلمان و ترک صدر رجب طیب اردوان نا نیام اٹ مروک آ رابطہ ستاکڑزک۔ پاکستان و سعودی عرب اٹی زرگزرانی و راجی بشخ آتیٹی ہڑتوم آ کنڈآتا کمکاری ءِ مون آ دننگ کن بھلو وارخواہی اس ارے۔ سعودی سفیر پارے کہ سعودی عرب پاکستان تون تینا برادرانہ تعلقداری تے بھاز اہمیت ایتک و مخلص سنگت و ایلم تکک۔ ہڑتوم آ ملک آتا نیام اٹ سنگتی نا رشتہ ہرہنوک آ دے اتون سوگو آن سوگو تر مننگ ءِ۔ پاکستانی پارلیمانی ڈل انا ساڑی آ دورہ سعودی عرب آن ہڑتوم آ کنڈآتا کمکاری نا پوسکن ءُ کسر ملنگک۔ سعودی سفیر اسپیکر ءِ سعودی عرب نا کنڈآن پاکستان اٹی راجی بشخ آتیٹی کمکاری ءِ برجاتخنگ نا باوری کرفسا پارے کہ سعودی عرب اٹ رہینگوک آ پاکستانی پردیسیک سعودی عرب نا شونداری و شونہالی ٹی اہم ءُ کڑد اس ادا کننگ ءُ۔ پوسکن آ لیبر کانود لاگو مننگ آن سعودی عرب اٹی کاریم کروک آ پردیسی تیکن آسراتی ودی مریک۔
