اسلام آباد۔ 26 نومبر (اے پی پی) بھارتی ناظم الامور گور واہلو وآلہ ءِ دفترخارجہ غا بٹنگسا 25 نومبر آ کوزہ گیر بھارتی فوج انا کنڈآن لین آف کنٹرول (ایل اوسی) نا باغ سرسیکٹر اٹی جنگ بندی نا بلااشتعال خلاف ورزی تیا ترند برانز ریکارڈ کننگا۔ بھارتی فوج انا بلااشتعال سم کاری ٹی 33 سال انا بیگناہ شاری اس شہید مس۔ پنچ شنبے نادے آ ترجمان دفترخارجہ نا رداٹ بھارتی ناظم الامور ءِ دفترخارجہ غا بٹنگسا برانزی مراسلہ ءِ اونا حوالہ کرے و پارے کہ کوزہ گیر بھارتی فوج ایل او سی و ورکنگ باؤنڈری نا پدریسہ خلاف ورزی ءِکرسا آرٹلری، بھلو و خودکار سلہہ غاتا کمک اٹ لس شاری آبادی ءِ شست کننگ ءِ۔ بھارتی ناظم الامور ءِ پاننگاکہ شاری آبادی ءِ دانستہ شست کننگ بے کچ قابل افسوز، انسانی عظمت و شرف، جہانی انسانی حق و جہانی انسانی کانود آتیان اسُل چپ ءِ۔ بھارت نا کنڈآن جنگ بندی نا دا خلاف ورزی تیان علاقائی امن و سلامتی ءِ بھلو خطرہ اس مون تروک ءِ، ہرانا نتیجہ اسٹریٹجک ردینک نا دروشم اٹ پیش تمنگ کیک۔ بھارت اینخو سال اٹی 2840 وار بلااشتعال جنگ بندی نا خلاف ورزی کرینے، ہراٹی 27 بیگناہ شاری شہید و 245 ٹھپی مسنو۔ بھارتی ناظم الامور ءِ معلومدار کننگاکہ ایل او سی آ بے چیٹی ٹی ودکی آن بھارت مقبوضہ کشمیر اٹ انسانی حق انا سنگین خلاف ورزی و بیدادی آن جہانی چکارءِ اسہ کنڈ کننگ کپک۔ بھارت آ زور شاغنگاکہ او اِرا ہزار مسٹ نا جنگ بندی معاہدہ نا پاسداری ءِ کے، جنگ بندی نا خلاف ورزی نا دا واقعہ غاتا جاست وپاست ءِ کرفے، بھارتی فوج ءِ جنگ بندی نا شرف نا پرمان کے، ایل اوسی و ورکنگ باؤنڈری آ اونا رداٹ امن ءِ برقرار تخے و اقوام متحدہ نا سلامتی کونسل نا قرارداد آتا رداٹ بھارت اقوام متحدہ نا فوجی مبصرین(یواین ایم او جی آئی پی) ءِ تینا کڑد ءِ ادا کننگ نا موکل ایتے۔
