اسلام آباد۔ 25 نومبر (اے پی پی) وزیر خارجہ شاہ محمود قریشی او آئی سی وزراخارجہ کونسل نا 47 می دیوان اٹی بشخ ہلنگ کن نائیجرنا اِرادے ئی دورہ ءِ کیک۔ دیوان 27 و 28 نومبر آ نیامی ٹی اڈ ہلنگ ءِ۔ چارشنبے نادے آ ترجمان دفترخارجہ نا رداٹ وزیر خارجہ مخدوم شاہ محمود قریشی اسلامی کمکار تنظیم(اوآئی سی) نا وزراء خارجہ کونسل (سی ایف ایم) نا 47 می دیوان اٹی پاکستانی ڈل انا کماشی ءِ کیک۔ 57 او آئی سی باسک ملک و 5 مبصر ملک آتا نمائندہ غاتا دیوان اٹی بشخ ہلنگ نا گمان ءِ۔ اِرادے ئی دیوان اٹی اسلاموفوبیا نا چٹفنگ و مذہب آتا توہین، تون اوار فلسطین، جموں و کشمیر جھیڑہ، غیر مسلم ریاست آتیٹی مسلم راج و اقلیت آتا حالیت۔ او آئی سی 2025ء نا ایکشن پروگرام و تہذیبی، دودوربیدہ ئی و مذہبی مکالمہ نا مون آ دننگ نا بابت چندی باندات آتیا شرہ مریک۔ کونسل اوآئی سی نا باسک افریقی ساحل ریاست آتے مون تروک، سلامتی و ہیومینٹیرین چیلنج’’ آتا بارواٹی ہم اسہ سیشن اس اڈہلیک۔ وزیر خارجہ 5 اگست 2019ء آن پد ہندوستان نا غیر کانودی و اسہ کنڈی کارروائی و اوٹی مقبوضہ جموں و کشمیر نا آبادیاتی پنجر ءِ بدل کننگ نا گام گیج و مقبوضہ علاقہ ٹی ودوک آ انسانی حق انا خلاف ورزی و انسانی حالیت آتے تالان کیک۔ داوخت آ وزیر خارجہ تینا ہم منصب/ باسک ملک آتا ڈل آتا سروک آتون ہڑتوم آکنڈآتا اوڑدہی ہم کیک۔
