اسلام آباد۔ 25 نومبر (اے پی پی) پارلیمانی کمیٹی کورونا دین انا دیوان چارشنبے نادے آ پارلیمنٹ ہاؤس اٹی اسپیکر قومی اسمبلی اسدقیصر نا کماشی ٹی مس۔ دیوان اٹی قومی اسمبلی نا باسک آک، بنجائی وزیر آتون اوار تعلقدار سرکاری ادارہ غاتا آفیسر آک بشخ ہلکر۔ داوخت آ اسپیکر پارے کہ کنا است خواہی ئس کہ غٹ جماعت آک دا دیوان اٹی بشخ ہلوسر انتئے کہ گڑاس فیصلہ قومی اہمیت نا مریرہ۔ گڑاس باندات آتیا بایدے سیاست مف۔ کمیٹی ءِ حوال ترسا این سی او سی کمامدارآک پاریر کہ کورونا نا ارٹ میکو لہر اٹ شدت بسنے۔ الس کورونا نا ایس او پی تیا عمل کیر۔ کورونا غان بچنگ کن رکھی گام گیج اختیار کننگے۔ ڈاکٹر فیصل سلطان کورونا نا حالیت آتیا حوال تس و ہسپتال آتا ساڑی حالیت آتا بارواٹی کمیٹی ءِ معلومدار کرے۔ بنجائی وزیر اسد عمر پارے کہ اپوزیشن نا جلسہ غاتیان کورونا ترندی اٹ تالان مننگ ءِ۔ اوپارے کہ اپوزیشن الس نا زند آتون گوازی کننگ ءِ۔ قومی سرکڑدہ غاتے تینا طرز عمل ءِ بدل کروئی مریک۔ ننے مخلوق ءِ سرپند کروئی ءِ کہ اوفتے عملدرآمد کروئی ءِ۔ کورونا نا ارٹ میکو لہر بھاز خطرناک ءِ۔ بھلو کچ اسے ٹی کورونا غان زہمی مخلوق ہسپتال آتیا ہِننگ ءُ۔ الس نا روزگار نا زہمی مننگ نا گڑتی ءِ۔ وزیراعظم نا خصوصی کمکار سیاسی باندات ملک عامر ڈوگر پارے کہ الس نا زند خطرہ ٹی ءِ دُن انگا موقع غا سیاست مف۔ اپوزیشن نا دیوان اٹ بفننگ سمجھ آن پیشن ءِ۔ اسپیکر مدام اپوزیشن ءِ عزت و شرف تس و او مدام ایوان ءِ جوان وڑاٹ چلیفینے۔
