اسلام آباد۔ 25 نومبر (اے پی پی) وزیر خارجہ شاہ محمود قریشی غیر کانودی آبادیاتی بدلی تتون اوار مقبوضہ کشمیر نا سنگین و تازہ حالیت آتیان معلومدار کننگ کن اقوام متحدہ نا سلامتی کونسل نا صدر و سیکرٹری جنرل ءِ اسہ چھٹی اس مون تسنے۔ چارشنبے نادے آ ترجمان دفترخارجہ نا رداٹ وزیر خارجہ تینا چھٹی ٹی مقبوضہ جموں و کشمیر اٹی انسانی حق انا بھلا و منظم خلاف ورزی تے تالان کرینے ہراڑآن ہندوستان نا کنڈآن امن و سلامتی ءِ خطرہ مون تروک ءِ۔ چھٹی ٹی خاص وڑاٹ مقبوضہ علاقہ ٹی مروک آ غیر کانودی آبادیاتی بدلی تیا خاص چکار کننگانے، ہرا اقوام متحدہ نا سلامتی کونسل نا قرارداد، اقوام متحدہ نا چارٹر و چارمیکو جنیوا کنونشن تون اوار جہانی کانود نا خلاف ورزی ءِ۔ چھٹی ٹی وزیر خارجہ سلامتی کونسل ءِ بھارتی فوجی کوزہ، ڈغار ضبط کننگ، غیر کشمیری تا آبادکاری و غیر کانودی ہنکین جوڑ کننگ نا اسہ بھلو حکمت عملی اسے نا نافذ کننگ آن معلومدار کننگانے۔ مقبوضہ جموں و کشمیر نا مسلم اکثریت ءِ اقلیت اٹ بدل کننگ نا بھارتی ایجنڈاٹی، ہندی کشمیریک تینا سیاسی و دودوربیدہ ئی شناخت و حق ملکیت ءِ گوہِنگ ءُ۔ چھٹی ٹی لین آف کنٹرول و ورکنگ باؤنڈری آ بھارت نا کنڈآن بلااشتعال سیز فائر نا خلاف ورزی و شاری آبادی والا علاقہ غاتے رزاک اٹ شست کننگ آن ہم معلومدار کننگانے۔ اینخوسال بھارت نا کنڈآن جنگ بندی نا 2،700 آن زیات خلاف ورزی تیٹی 25 بے گناہ بندغ شہید و 200 آن زیات بے گناہ شاری ٹھپی مسنو۔ وزیر خارجہ سلامتی کونسل آن خواست کرینے کہ او تینا براہ راست زمواری تے کاریم اٹ اتسا بھارت ءِ جھیڑہ ئی آ علاقہ نا آبادیاتی پنجر ءِ بدل کننگ و سلامتی کونسل نا دا قرارداد آتا خلاف ورزی تیان توننگے ہرافتے ٹی کشمیری تا حق خودارادیت نا روا حق ءِ تسلیم کننگانے۔ وزیر خارجہ نا دا چھٹی اقوام متحدہ نا سلامتی کونسل و سیکرٹری جنرل ءِ مقبوضہ جموں و کشمیر نا سنگین حالیت آتیان باقاعدگی اٹ معلومدار کننگ و اقوام متحدہ نا سلامتی کونسل نا قرارداد آتا رداٹ کشمیری الس نا است خواہی تا رداٹ جموں و کشمیر جھیڑہ نا ایسری کن پاکستان نا پدریسہ کوشست آتا بشخ ءِ۔
