اسلام آباد۔ 25 نومبر (اے پی پی) پاکستان اوغانستان نا شار بامیان اٹی مروک آ دھماکہ غاتا ترندی اٹ مذمت ءِ کرینے، ہراٹی نہادی انسانی جان تازیان مس و چندیک ٹھپی مسر۔ چارشنبے نادے آ ترجمان دفترخارجہ اسہ بیان اسے ٹی پدسلوک آ خاہوت آتون ہڑزخواہی و دا بیہمانہ جلہو آتیٹی ٹھپی مروک آتا زوت دراخ جوڑی کن دعا کرینے، ترجمان پارے کہ پاکستان داہیت ءِ گڑتی اتون نوشتہ کرینے کہ ہراتم اوغان امن عمل اٹ پیش رفت مریک، شاری ادارہ غاتا ہدف بشمول تعلیمی ادارہ و السی ہند آتیا دہشت گردی نا واقعہ غاک ہم ودرہ۔ ترجمان پارے کہ دا جلہو آتا مسخت امن نا کوشست آتے نسخان تننگ ءِ۔ ننے امن ءِ خراب کروک آتا ناپاک عزم انا بارواٹ چوکس مننگ نا گرج ءِ۔ ترجمان پارے کہ پاکستان ہروڑنا دہشت گردی نا مذمت نا درشانی ءِ کیک۔ نن غم انا داساہت اٹ اوغان قوم اتون یکجہتی نا درشان و پرامن، سوگو و شونہال اوغانستان کن تینا عزم انا درشانی ءِ کینہ۔
