اسلام آباد۔ 25 نومبر (اے پی پی) بنجائی وزیر حوالکاری و شینکاری سینیٹر شبلی فراز پارینے کہ پاکستان تون اوار اوار ڈیہہ کن چین پاکستان اقتصادی راہداری ڈٹ(سی پیک) گیم چینجر اس مریک، دا ڈٹ اٹ روڈ، ریل انا نظام، سمندری بندرگاہ ، تیل و گیس پیپ لین، آپٹیکل فائبر شاغنگ، خصوصی اقتصادی زون، سیم انا ایپار واپار و کمکاری نا ہند، و آزاد واپاری معاہدہ اوار ءِ، سی پیک ڈٹ آن پاکستان و چین ہڑتوم آک فائدہ ہرفرہ، سی پیک آن جم وڑاٹ 2.3 ملین ملازمت آتا وارخواہی ودی مریک ہراڑآن جی ڈی پی ٹی سالانہ 2.5 درسد آن زیات ودکی مریک، چین پاکستان اقتصادی راہداری (سی پیک) تینا اولیکو ریسہ (2020-2015)ء ٹی قابل ذکر شونداری کرینے۔ او چارشنبے نادے آ داڑے نیشنل پارلیمنٹری ٹاسک فورس پائیدار شونداری نا ہدف(ایس ڈی جیز) و سینیٹ نا خصوصی کمیٹی قومی اتحاد نا کنڈآن سی پیک چیلنجز و وارخواہی تیا قومی سیمینار آن تران کریکہ۔ سی پیک پارلیمانی کمیٹی نا چیئرمین شیر علی ارباب، بیرسٹر سیف علی، چوہدری شفیق تون اوار ایلو ترانکارآک ہم سیمینارآن تران کریر۔ دود آن تران کرسا بنجائی وزیر حوالکاری و شینکاری سینیٹر شبلی فراز پارے کہ چین پاکستان اقتصادی راہداری (سی پیک) چین انا بیلٹ اینڈ روڈ انیشی ایٹیو (بی آر آئی) نا فلیگ شپ ڈٹ ءِ، 2015ء ٹی بناکروک آ دا اسہ بے کچ اہم ءُ انفراسٹرکچر ڈویلپمنٹ ڈٹ اسے ہرانا خڑچ 60ارب ڈالر آن زیات ءِ۔ چین انا بیلٹ اینڈ روڈ انیشی ایٹیو (بی آر آئی) و اونا فلیگ شپ ڈٹ سی پیک کنیٹیویٹی، کواپریٹوڈویلپمنٹ و تین پہ تینی زرگزرانی سیبوءِ پک کیک، داڑآن مچ آ ڈیہہ ٹی امن و ہم آہنگی، شریک ملک آتا نیام اٹ دودوربیدہ ئی و سیاسی انضمام نا کنڈآ کاہک۔ اوپارے کہ دا ڈٹ اٹ روڈ، ریل انا نظام، سمندری بندرگاہ، تیل و گیس پیپ لین، آپٹیکل فائبر شاغنگ، خصوصی اقتصادی زون، سیم پار واپار و کمکاری نا ہند، و آزاد واپاری معاہدہ اوار ءُ۔ دانا مسخت سویلی دے ٹکی ایشیاء ، سویلی ایشیاء، نیامی و دیکی ایشیاء، دے ٹک نیامی، یورپ و افریقہ نا 65 ملک آتیان تعلق تخوک آ دنیا نا کم و ود 63درسد آبادی نا شونہال آخبت کن گچین زرگزرانی رابطہ جوڑ کننگ ناءِ، سی پیک جیو اکنامک لینڈ اسکیپ ءِ پوسکن ءُ دروشم اس تننگ ءِ و دانئے بیرہ پاکستان بلکن مچ آ ڈیہہ کن گیم چینجر اسے، ہرا اسیجا شونداری نا تصور آ مبنی ءِ۔ اوپارے کہ اسہ محتاط وڑ اسے نا رداٹ سی پیک سڑک و پول آتا ٹول انا مد اٹی 6 آن 8 بلین سالانہ یکجا کننگ اٹ کمکارمریک، سڑک نا بنداوی پنجر نا ڈٹ آتیٹی کساس ءِ کہ 51،000 ملازمت ودی مریک، ہرافتیان 94درسد پاکستانی تیکن ءُ، پاکستان و چین نا اسیجا ڈٹ(جوائنٹ وینچر) نا رداٹ 1.5 ملین ملازمت نا وارخواہی ودی مریک، ہرافتیان 33 درسد آن زیات خصوصی وڑاٹ پاکستانی شاری تیکن مریرہ۔ بنجائی وزیر سینیٹر شبلی فراز پارے کہ نقل و حمل نا بنداوی پنجر و توانائی نا بشخ آتا زیات تر ڈٹ سرسہبی اٹ مون آ ہنانو، بھاز انگا ڈٹ آک عملدرآمد نا ریسہ ٹی ءُ۔
